പെൻസിൽവേനിയയിൽ ഒരു ഗാർഹിക വിഷയവുമായി ബന്ധപ്പെട്ട അന്വേഷണത്തിനായെത്തിയ പൊലീസ് ഉദ്യോ​ഗസ്ഥർക്ക് നേരെ വെടിവെപ്പ്. സംഭവത്തിൽ മൂന്ന് പൊലീസ് ഉദ്യോഗസ്ഥർ കൊല്ലപ്പെടുകയും മറ്റ് രണ്ട് പേർക്ക് ഗുരുതരമായി പരിക്കേൽക്കുകയും ചെയ്തു. പ്രാദേശിക സമയം ഉച്ചയ്ക്ക് 2 മണിയോടെയാണ് സംഭവം നടന്നത്. സംഭവം നടന്ന സ്ഥലത്ത് നിന്ന് ഒരു പൊലീസ് ഉദ്യോഗസ്ഥനെ ഹെലികോപ്റ്ററിൽ ആശുപത്രിയിലേക്ക് മാറ്റുന്നതിൻ്റെ ദൃശ്യങ്ങൾ പുറത്തുവന്നിട്ടുണ്ട്.

വെടിവെപ്പിനെ തുടർന്ന് സമീപത്തുള്ള സ്പ്രിംഗ് ഗ്രോവ് സ്കൂൾ കുട്ടികളെ അവിടെ നിന്നും മാറ്റിയിരുന്നു. പിന്നീട് സ്കൂളിനെ സംഭവം ബാധിച്ചിട്ടില്ലെന്ന് അധികൃതർ അറിയിച്ചു. പൊതുജനങ്ങൾക്ക് നിലവിൽ ഭീഷണിയൊന്നുമില്ലെന്നും അധികൃതർ വ്യക്തമാക്കി. അതേസമയം പൊലീസ് നടത്തിയ വെടിവെപ്പിൽ അക്രമി കൊല്ലപ്പെട്ടതായി പെൻസിൽവേനിയ സ്റ്റേറ്റ് പോലീസ് കമ്മീഷണർ കേണൽ ക്രിസ്റ്റഫർ പാരിസ് അറിയിച്ചു.

വടക്കൻ കോഡോറസ് ടൗൺഷിപ്പിലെ യോർക്ക് കൗണ്ടിയിലെ ഒരു ഗ്രാമീണ മേഖലയിലാണ് വെടിവെപ്പ് നടന്നത്. ഫിലാഡൽഫിയയിൽ നിന്ന് ഏകദേശം 160 കിലോമീറ്റർ കിഴക്കായിട്ടാണ് ഈ സ്ഥലം. തലേദിവസം ആരംഭിച്ച ഒരു അന്വേഷണത്തിന്റെ ഭാ​ഗമായാണ് പൊലീസ് സംഘം ഇവിടെയെത്തിയതെന്ന് അധികൃതർ അറിയിച്ചു.

അന്വേഷണം പുരോഗമിക്കുന്നതിനാൽ കൂടുതൽ വിവരങ്ങൾ പുറത്തുവിട്ടിട്ടില്ലെന്ന് കമ്മീഷണർ പാരിസ് പറഞ്ഞു. സംഭവം നടന്ന സ്ഥലത്തെത്തിയ പെൻസിൽവേനിയ ഗവർണർ ജോഷ് ഷാപ്പിറോ കൊല്ലപ്പെട്ട ഉദ്യോഗസ്ഥരുടെ കുടുംബങ്ങളെ സന്ദർശിച്ചു. "ഈ രാജ്യത്തെയും സംസ്ഥാനത്തെയും സേവിച്ച മൂന്ന് അമൂല്യ ജീവനുകളുടെ നഷ്ടത്തിൽ ഞങ്ങൾ ദുഃഖിക്കുന്നു. ഇത്തരം അക്രമങ്ങൾ അംഗീകരിക്കാനാവില്ല, ഒരു സമൂഹമെന്ന നിലയിൽ നമ്മൾ കൂടുതൽ നന്നാവണം," ഷാപ്പിറോ പറഞ്ഞു.

കൊല്ലപ്പെട്ട ഉദ്യോഗസ്ഥരുടെ ബഹുമാനാർത്ഥം സംസ്ഥാനത്തെ എല്ലാ പതാകകളും പകുതി താഴ്ത്തിക്കെട്ടാൻ ഗവർണർ ഉത്തരവിട്ടു. പൊതു കെട്ടിടങ്ങളിലും സ്ഥലങ്ങളിലുമുള്ള എല്ലാ പെൻസിൽവേനിയൻ പതാകകളും പകുതി താഴ്ത്തിക്കെട്ടും. അന്വേഷണത്തിൽ പ്രാദേശിക, സംസ്ഥാന പങ്കാളികൾക്ക് സഹായം നൽകാൻ എഫ്.ബി.ഐ. ഏജന്റുമാർ സ്ഥലത്തുണ്ടെന്ന് എഫ്.ബി.ഐ. ഡയറക്ടർ കാഷ് പട്ടേൽ അറിയിച്ചു. "കൊല്ലപ്പെട്ട ഉദ്യോഗസ്ഥർക്കും അവരുടെ കുടുംബങ്ങൾക്കും യോർക്ക് കൗണ്ടിയിലെ മുഴുവൻ ജനങ്ങൾക്കും വേണ്ടി ഞങ്ങൾ പ്രാർത്ഥിക്കുന്നു," പട്ടേൽ പ്രസ്താവനയിൽ പറഞ്ഞു.