പത്തനംതിട്ട: ലൈംഗികാരോപണ വിവാദങ്ങൾക്കിടെ പാലക്കാട് എംഎൽഎ രാഹുൽ മാങ്കൂട്ടത്തിൽ ശബരിമല ദർശനം നടത്തി. നിയമസഭയിലെത്തിയതിന് പിന്നാലെയാണ് അദ്ദേഹം ശബരിമലയിലെത്തിയത്. അടൂരിലെ വീടിനടുത്തുള്ള ക്ഷേത്രത്തിൽനിന്ന് കെട്ടുനിറച്ച ശേഷമാണ് രാഹുൽ മാങ്കൂട്ടത്തിൽ ദർശനത്തിനായി പോയത്. രാത്രി പത്തുമണിയോടെ പമ്പയിലെത്തിയ അദ്ദേഹം അവിടെനിന്ന് കെട്ടുനിറച്ച് സന്നിധാനത്തേക്ക് യാത്ര തിരിച്ചു. പുലർച്ചെ ദർശനം കഴിഞ്ഞ് മടങ്ങുമെന്നാണ് വിവരം.

ലൈംഗികാരോപണത്തെത്തുടർന്നുണ്ടായ വിവാദങ്ങൾക്കിടെ, അഭ്യൂഹങ്ങൾക്ക് വിരാമമിട്ട് കഴിഞ്ഞ ദിവസം രാഹുൽ മാങ്കൂട്ടത്തിൽ നിയമസഭയിലെത്തിയിരുന്നു. പ്രതിപക്ഷ നേതാവ് വി.ഡി. സതീശന്റെയും കോൺഗ്രസിലെ ഒരുവിഭാഗം നേതാക്കളുടെയും നിലപാടിനെ തള്ളിക്കൊണ്ടായിരുന്നു രാഹുലിന്റെ ഈ നീക്കം. നിയമസഭാ സമ്മേളനത്തിന്റെ ആദ്യ ദിവസം അതീവ രഹസ്യമായാണ് അദ്ദേഹം സഭയിലെത്തിയത്. പ്രതിപക്ഷ നിരയുടെ ഏറ്റവും പിന്നിൽ പ്രത്യേക ബ്ലോക്കിലായിരുന്നു രാഹുൽ ഇരുന്നത്. ശനിയാഴ്ച മുതൽ മണ്ഡലത്തിൽ സജീവമാകുമെന്ന് അദ്ദേഹം പിന്നീട് പ്രതികരിച്ചിരുന്നു.