ന്യൂയോർക്ക് ടൈംസിനെതിരെ 15 ബില്യൺ ഡോളറിൻ്റെ മാനനഷ്ടക്കേസ് ഫയൽ ചെയ്യുമെന്ന് മുൻ യുഎസ് പ്രസിഡൻ്റ് ഡൊണാൾഡ് ട്രംപ്. മരണപ്പെട്ട സാമ്പത്തിക വിദഗ്ദ്ധൻ ജെഫ്രി എപ്സ്റ്റീനുമായുള്ള തൻ്റെ ബന്ധത്തെക്കുറിച്ച് അപകീർത്തികരമായ ലേഖനങ്ങൾ പ്രസിദ്ധീകരിച്ചതിനാണ് ഈ നിയമനടപടി.

ട്രംപിൻ്റെ സോഷ്യൽ മീഡിയ പ്ലാറ്റ്‌ഫോമായ ട്രൂത്ത് സോഷ്യലിലൂടെയാണ് അദ്ദേഹം ഈ പ്രഖ്യാപനം നടത്തിയത്. "നമ്മുടെ രാജ്യത്തിൻ്റെ ചരിത്രത്തിലെ ഏറ്റവും മോശപ്പെട്ടതും അധഃപതിച്ചതുമായ പത്രങ്ങളിലൊന്നായ ന്യൂയോർക്ക് ടൈംസിനെതിരെ 15 ബില്യൺ ഡോളറിൻ്റെ മാനനഷ്ടക്കേസ് ഫയൽ ചെയ്യുന്നതിൽ എനിക്ക് സന്തോഷമുണ്ട്," ട്രംപ് പറഞ്ഞു. ന്യൂയോർക്ക് ടൈംസ് തീവ്ര ഇടതുപക്ഷ ഡെമോക്രാറ്റ് പാർട്ടിയുടെ പ്രധാന പത്രമായി മാറിയെന്നും ട്രംപ് ആരോപിച്ചു.

ന്യൂയോർക്ക് ടൈംസിൻ്റെ പ്രവർത്തിയെ "ഏറ്റവും വലിയ നിയമവിരുദ്ധ പ്രചാരണ സംഭാവന" ആയിട്ടാണ് താൻ കാണുന്നതെന്നും ട്രംപ്. കൂടാതെ, കമല ഹാരിസിനുള്ള പത്രത്തിൻ്റെ അംഗീകാരം ഒന്നാം പേജിൽ ഒളിപ്പിച്ചു വെച്ചെന്നും ട്രംപ് ആരോപിച്ചു. കഴിഞ്ഞ ദശാബ്ദങ്ങളായി തന്നെക്കുറിച്ചും തൻ്റെ കുടുംബത്തെക്കുറിച്ചും ബിസിനസിനെക്കുറിച്ചും തൻ്റെ 'അമേരിക്ക ഫസ്റ്റ്' പ്രസ്ഥാനത്തെക്കുറിച്ചും പത്രം നുണകൾ പ്രചരിപ്പിക്കുകയാണെന്നും അദ്ദേഹം കുറ്റപ്പെടുത്തി.

കൂടുതൽ വിവരങ്ങൾ നൽകാതെ, ഫ്ലോറിഡയിൽ കേസ് ഫയൽ ചെയ്യുമെന്നും ഡൊണാൾഡ് ട്രംപ് വ്യക്തമാക്കി. അതേസമയം ഈ വിഷയത്തിൽ ന്യൂയോർക്ക് ടൈംസ് ഇതുവരെ പ്രതികരിച്ചിട്ടില്ലെന്ന് റോയിട്ടേഴ്‌സ് റിപ്പോർട്ട് ചെയ്യുന്നു.