കേന്ദ്രസർക്കാർ പദ്ധതികളുടെ ആനുകൂല്യങ്ങൾ ജനങ്ങൾക്ക് ലഭിക്കുന്നതിനായി കേരള ബിജെപി പുതിയ സംവിധാനമൊരുക്കുന്നു. ഇതിൻ്റെ ഭാഗമായി എല്ലാ ആഴ്ചയിലും 'മീറ്റ് ദ ലീഡർ' എന്ന പരിപാടി സംഘടിപ്പിക്കും. ബിജെപി സംസ്ഥാന ഓഫീസായ മാരാർജി ഭവനിൽ നടക്കുന്ന ഈ പരിപാടിയിൽ കേന്ദ്രമന്ത്രിമാരും പാർലമെന്റ് അംഗങ്ങളും പാർട്ടി ദേശീയ നേതാക്കളും പങ്കെടുക്കും.

ഈ വേദിയിൽ പൊതുജനങ്ങൾക്ക് കേന്ദ്രമന്ത്രിമാരോടും എംപിമാരോടും നേരിട്ട് തങ്ങളുടെ ആവശ്യങ്ങൾ അറിയിക്കാം. പ്രധാനമന്ത്രി നരേന്ദ്ര മോദിയുടെ ജന്മദിനമായ സെപ്റ്റംബർ 17-ന് ഉച്ചയ്ക്ക് 3 മണിക്ക് ബിജെപി സംസ്ഥാന പ്രസിഡന്റ് രാജീവ് ചന്ദ്രശേഖർ 'മീറ്റ് ദ ലീഡർ' പരിപാടി ഉദ്ഘാടനം ചെയ്യും. കേന്ദ്ര ന്യൂനപക്ഷ കാര്യ സഹമന്ത്രി ജോർജ് കുര്യൻ മുഖ്യാതിഥിയാകും.

"കൂടെയുണ്ട് ഞങ്ങൾ എന്നത് വെറുമൊരു വാഗ്ദാനമല്ല, ഇന്നാട്ടിലെ ജനങ്ങളോടുള്ള കേരള ബിജെപിയുടെ പ്രതിബദ്ധതയാണ്" എന്ന് രാജീവ് ചന്ദ്രശേഖർ പ്രസ്താവിച്ചു. നരേന്ദ്ര മോദി നടപ്പാക്കുന്ന ക്ഷേമപദ്ധതികൾ കേരളത്തിലെ ജനങ്ങൾക്ക് യാതൊരു വേർതിരിവുമില്ലാതെ ലഭ്യമാക്കുകയാണ് തങ്ങളുടെ ലക്ഷ്യമെന്നും അദ്ദേഹം കൂട്ടിച്ചേർത്തു.