ബിസിസിഐയുടെ പുതിയ സ്പോൺസറായി അപ്പോളോ ടയേഴ്സ്. നേരത്തെ ഇന്ത്യൻ ക്രിക്കറ്റ് ടീമിൻ്റെ സ്പോൺസർമാരായിരുന്ന ഡ്രീം11-മായുള്ള കരാർ അവസാനിച്ചതിന് പിന്നാലെയാണ് പുതിയ പ്രഖ്യാപനം. രണ്ടര വർഷത്തേക്കാണ് അപ്പോളോ ടയേഴ്സുമായി ബിസിസിഐ കരാറിലെത്തിയത്. 2028 മാർച്ചിൽ ഈ കരാർ അവസാനിക്കും.

ഇതനുസരിച്ച്, ഇന്ത്യൻ പുരുഷ, വനിതാ ക്രിക്കറ്റ് ടീമുകളുടെ ജഴ്സിയിൽ അപ്പോളോ ടയേഴ്സിന്റെ ലോഗോ ഇനിമുതൽ കാണാം. 579 കോടി രൂപയുടെ കരാറാണിതെന്നാണ് റിപ്പോർട്ടുകൾ സൂചിപ്പിക്കുന്നത്. ഈ കാലയളവിൽ ഇന്ത്യൻ ക്രിക്കറ്റ് ടീം 121 അന്താരാഷ്ട്ര മത്സരങ്ങളും 21 ഐസിസി ടൂർണമെന്റുകളും കളിക്കും. അതായത്, ഓരോ മത്സരത്തിനും സ്പോൺസർ ഏകദേശം 4.5 കോടി രൂപ ചെലവഴിക്കും. നേരത്തെ സ്പോൺസറായിരുന്ന ഡ്രീം11 ഒരു മത്സരത്തിന് നാല് കോടി രൂപയാണ് നൽകിയിരുന്നത്.

പുതിയ പങ്കാളിത്തത്തെക്കുറിച്ച് ബിസിസിഐ ഓണററി സെക്രട്ടറി ദേവജിത് സൈക്കിയയും വൈസ് പ്രസിഡന്റ് രാജീവ് ശുക്ലയും സന്തോഷം രേഖപ്പെടുത്തി. ഇന്ത്യൻ ക്രിക്കറ്റിൻ്റെ ആവേശവും അപ്പോളോ ടയേഴ്സിന്റെ പാരമ്പര്യവും ഒരുമിക്കുന്ന ചരിത്രനിമിഷമാണിതെന്നും ഇരു സ്ഥാപനങ്ങളുടെയും വളർച്ചയ്ക്ക് ഈ പങ്കാളിത്തം സഹായകമാകുമെന്നും അവർ പറഞ്ഞു.