ഗുവാഹത്തി: അസംസ്‌കൃത എണ്ണയുടെയും പ്രകൃതിവാതകത്തിന്റെയും ഇറക്കുമതി കുറയ്ക്കുന്നതിന് കേന്ദ്ര സർക്കാർ നടപടികൾ സ്വീകരിച്ചു വരികയാണെന്ന് പ്രധാനമന്ത്രി നരേന്ദ്ര മോദി. ഫോസിൽ ഇന്ധനങ്ങളുടെ പര്യവേഷണത്തിലും ഹരിത ഊർജത്തിലും കൂടുതൽ ശ്രദ്ധ കേന്ദ്രീകരിക്കുമെന്നും അദ്ദേഹം പറഞ്ഞു. ആസാമിലെ നുമാലിഗഡിൽ ഒരു പൊതു റാലിയെ അഭിസംബോധന ചെയ്ത് സംസാരിക്കുകയായിരുന്നു പ്രധാനമന്ത്രി.
ലോകത്തിലെ ഏറ്റവും വേഗത്തിൽ വളരുന്ന സമ്പദ്‌വ്യവസ്ഥകളിൽ ഒന്നായി ഇന്ത്യ ഉയർന്നുവരുമ്പോൾ, ഊർജ ആവശ്യകതകൾക്ക് മറ്റു രാജ്യങ്ങളെ ആശ്രയിക്കേണ്ടി വരുമെന്ന് മോദി ചൂണ്ടിക്കാട്ടി. ഈ സാഹചര്യം മാറ്റാൻ, രാജ്യത്തിനകത്ത് ഊർജോത്പാദനം വർദ്ധിപ്പിക്കേണ്ടത് അത്യാവശ്യമാണെന്നും അദ്ദേഹം ചൂണ്ടിക്കാട്ടി.
"നിലവിലെ സാഹചര്യം മാറ്റുന്നതിന് നമ്മുടെ ഊർജ ആവശ്യകതകൾ നിറവേറ്റുന്നതിലായിരിക്കണം ശ്രദ്ധ കേന്ദ്രീകരിക്കേണ്ടത്. എണ്ണ പര്യവേഷണത്തിലും ഹരിത ഊർജ ഉത്പാദനത്തിലും കേന്ദ്ര സർക്കാർ പ്രവർത്തിച്ചുവരികയാണ്," പ്രധാനമന്ത്രി കൂട്ടിച്ചേർത്തു.
ഒരു പ്രധാന ബദൽ ഊർജ്ജ സ്രോതസ്സാണ് എഥനോൾ. നുമാലിഗഡിൽ പുതുതായി ഉദ്ഘാടനം ചെയ്ത ബയോ എഥനോൾ റിഫൈനറി കർഷകർക്കും ഗോത്രവർഗ വിഭാഗങ്ങൾക്കും ഗുണം ചെയ്യുമെന്നും അദ്ദേഹം പറഞ്ഞു. ആസാമിലെ പോളിപ്രൊപ്പിലീൻ പ്ലാന്റ് പ്രാദേശിക സമ്പദ്‌വ്യവസ്ഥക്ക് വളരെയധികം ഗുണം ചെയ്യുമെന്നും പ്രധാനമന്ത്രി.
ആസാമിൽ 12,000 കോടിയലധികം രൂപയുടെ വിവിധ വികസന പദ്ധതികൾക്ക് പ്രധാനമന്ത്രി മോദി ഞായറാഴ്ച തുടക്കം കുറിച്ചു. ഇതിൽ ഊർജ, സെമികണ്ടക്ടർ മേഖലകൾക്ക് വലിയ പ്രാധാന്യമുണ്ട്. 'ആത്മനിർഭർ ഭാരത്' പദ്ധതിയുടെ പ്രധാന ഘടകങ്ങളാണ് ഊർജ്ജവും സെമികണ്ടക്ടറുകളും. ഈ മേഖലകളിൽ ആസാമിന് ഒരു പ്രധാന പങ്ക് വഹിക്കാൻ കഴിയുമെന്നും പ്രധാനമന്ത്രി അടിവരയിട്ട് പറഞ്ഞു.