ജെൻ സി പ്രക്ഷോഭത്തിൽ കൊല്ലപ്പെട്ടവരെ രക്തസാക്ഷികളായി ആദരിക്കുമെന്ന് നേപ്പാൾ പ്രധാനമന്ത്രി സുശീല കാർക്കി പ്രഖ്യാപിച്ചു. ചുമതലയേറ്റ ശേഷം രാഷ്ട്രത്തെ അഭിസംബോധന ചെയ്തുകൊണ്ടുള്ള തന്റെ ആദ്യ പ്രസംഗത്തിലാണ് അവർ ഇക്കാര്യം വ്യക്തമാക്കിയത്.

തന്റെ ഇടക്കാല സർക്കാർ ഇരകളുടെ കുടുംബങ്ങൾക്ക് എല്ലാ പിന്തുണയും നൽകുമെന്നും, ജീവൻ നഷ്ടപ്പെട്ട യുവ പ്രതിഷേധക്കാരുടെ ത്യാഗത്തെ അംഗീകരിക്കുമെന്നും കാർക്കി പറഞ്ഞു. കൊല്ലപ്പെട്ടവരുടെ കുടുംബങ്ങൾക്ക് 10 ലക്ഷം രൂപ ധനസഹായം നൽകുമെന്നും പരിക്കേറ്റവർക്കും സഹായധനം നൽകുമെന്നും അവർ കൂട്ടിച്ചേർത്തു.

നേപ്പാളിലെ യുവാക്കളുടെ നേതൃത്വത്തിൽ നടന്ന വലിയ കലാപത്തെ തുടർന്ന് മുൻ പ്രധാനമന്ത്രി കെ.പി. ശർമ്മ ഒലി രാജിവെച്ചതിന് പിന്നാലെയാണ് മുൻ ചീഫ് ജസ്റ്റിസായ സുശീല കാർക്കി രാജ്യത്തെ ആദ്യത്തെ വനിതാ പ്രധാനമന്ത്രിയായി സ്ഥാനമേൽക്കുന്നത്. അസ്ഥിരമായ ഈ സമയത്ത് രാജ്യത്തെ സ്ഥിരപ്പെടുത്താനാണ് തന്റെ നേതൃത്വത്തിലുള്ള സർക്കാർ രൂപീകരിച്ചതെന്ന് കാർക്കി പറഞ്ഞു.

അധികാരം ആസ്വദിക്കാനല്ല താനും കൂടെയുള്ളവരും എത്തിയിരിക്കുന്നതെന്നും, ആറു മാസത്തിനുള്ളിൽ പുതിയ പാർലമെന്റിന് അധികാരം കൈമാറുമെന്നും അവർ പറഞ്ഞു. നേപ്പാളിന്റെ രാഷ്ട്രീയ, സാമ്പത്തിക പ്രതിസന്ധികളെ നേരിടാൻ ജനങ്ങളുടെ ഐക്യം ആവശ്യമാണെന്നും അവർ കൂട്ടിച്ചേർത്തു.

വിവാദമായ സോഷ്യൽ മീഡിയ നിരോധനത്തെത്തുടർന്ന് സെപ്റ്റംബർ എട്ടിന് കാഠ്മണ്ഡുവിൽ പൊട്ടിപ്പുറപ്പെട്ട പ്രതിഷേധങ്ങൾ പിന്നീട് അഴിമതി, തൊഴിലില്ലായ്മ, അസമത്വം എന്നിവയ്‌ക്കെതിരായ വലിയ പ്രക്ഷോഭങ്ങളായി വളർന്നു. പ്രകടനക്കാരും പോലീസും തമ്മിലുള്ള ഏറ്റുമുട്ടലിൽ കുറഞ്ഞത് 51 പേർ കൊല്ലപ്പെടുകയും 1,300-ൽ അധികം പേർക്ക് പരിക്കേൽക്കുകയും ചെയ്തിരുന്നു.