പത്തനംതിട്ട: ഹണിട്രാപ്പിൽ കുടുക്കി യുവാക്കളെ അതിക്രൂരമായി മർദിച്ച കേസിൽ യുവദമ്പതികൾ പോലീസ് പിടിയിൽ. പത്തനംതിട്ട ചരൽക്കുന്ന് സ്വദേശി ജയേഷ് (32), ഭാര്യ രശ്മി (28) എന്നിവരാണ് അറസ്റ്റിലായത്. യുവാക്കൾ ലൈംഗിക ബന്ധത്തിൽ ഏർപ്പെടുന്നതായി അഭിനയിപ്പിക്കുകയും ആ ദൃശ്യങ്ങൾ പകർത്തുകയും ചെയ്തു. അതിക്രൂരമായ പീഡനമാണ് യുവാക്കൾ നേരിട്ടതെന്നും പൊലീസ് റിപ്പോർട്ട്.

ആലപ്പുഴ, റാന്നി സ്വദേശികളായ രണ്ട് യുവാക്കളാണ് ക്രൂരതയ്ക്ക് ഇരയായത്. റാന്നി സ്വദേശിയെ സെപ്റ്റംബർ ഒന്നിന് മാരാമൺ ജംഗ്ഷനിൽ നിന്ന് വീട്ടിലേക്ക് വിളിച്ചുവരുത്തിയാണ് ആദ്യം പീഡിപ്പിച്ചത്. കട്ടിലിൽ കിടത്തി നഗ്നനാക്കിയ ശേഷം ദേഹത്ത് മുഴുവൻ മുളകുസ്പ്രേ അടിച്ചു. തുടർന്ന് ജനനേന്ദ്രിയത്തിൽ 23 സ്റ്റാപ്ലറുകൾ അടിച്ചതായും ഇരുമ്പ് വടികൊണ്ട് ദേഹമാസകലം മർദിച്ചതായും നഖം പിഴുതെടുത്തതായും പോലീസ് എഫ്.ഐ.ആറിൽ പറയുന്നു. ശേഷം, മൊബൈലും പണവും തട്ടിയെടുത്ത പ്രതികൾ യുവാവിനെ പൊതുസ്ഥലത്ത് ഉപേക്ഷിച്ച് കടന്നുകളഞ്ഞു.

ആലപ്പുഴ സ്വദേശിയായ യുവാവിനെ വിളിച്ചുവരുത്തിയത് രശ്മിയായിരുന്നു. സമാനമായ രീതിയിൽ പീഡിപ്പിച്ച ശേഷം ഇയാളെയും പൊതുസ്ഥലത്ത് ഉപേക്ഷിച്ചു. ഓട്ടോ തൊഴിലാളികളാണ് ഇയാളെ ആശുപത്രിയിലെത്തിച്ചത്. ഡോക്ടറാണ് പിന്നീട് പോലീസിനെ വിവരമറിയിച്ചത്.

ദൃശ്യങ്ങൾ പകർത്തിയതിനാൽ നാണക്കേട് ഭയന്നാണ് ഇരകൾ പരാതി നൽകാൻ മടിച്ചതെന്ന് പോലീസ് പറയുന്നു. ഗുരുതര പരിക്കുകളോടെ ആശുപത്രിയിൽ പ്രവേശിപ്പിച്ച യുവാക്കളുടെ ആരോഗ്യനില ഇപ്പോൾ തൃപ്തികരമാണ്. സംഭവത്തിൽ പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്.