ബീജിംഗ്: റഷ്യയിൽ നിന്ന് എണ്ണ വാങ്ങിയതിന്റെ പേരിൽ ചൈനയ്ക്ക് മേൽ 100 ശതമാനം താരിഫ് ഏർപ്പെടുത്താനുള്ള യു.എസ്. പ്രസിഡന്റ് ഡൊണാൾഡ് ട്രംപിന്റെ ആഹ്വാനത്തിനെതിരെ ശക്തമായ പ്രതികരണവുമായി ചൈന. സ്പെയിനിൽ വെച്ച് നടക്കാനിരിക്കുന്ന പുതിയ വ്യാപാര ചർച്ചകൾക്ക് മുന്നോടിയായാണ് ചൈനയുടെ ഈ നീക്കം.

"ചൈനയ്ക്ക് സമാധാനത്തിലും സുരക്ഷയിലും മികച്ച റെക്കോർഡാണുള്ളതെന്നും ഞങ്ങൾ യുദ്ധങ്ങളിൽ പങ്കെടുക്കുകയോ ആസൂത്രണം ചെയ്യുകയോ ചെയ്യുന്നില്ല," എന്നും ചൈനീസ് വിദേശകാര്യ മന്ത്രി വാങ് യി സ്ലോവേനിയ സന്ദർശനത്തിനിടെ പറഞ്ഞു. യുദ്ധത്തിന് പ്രശ്നങ്ങൾ പരിഹരിക്കാനാവില്ലെന്നും ഉപരോധങ്ങൾ കാര്യങ്ങൾ കൂടുതൽ സങ്കീർണ്ണമാക്കുകയേ ഉള്ളൂവെന്നും അദ്ദേഹം കൂട്ടിച്ചേർത്തു.

"ചൈന ഒരു ഉത്തരവാദിത്തമുള്ള പ്രധാന രാജ്യമാണ്, സമാധാനത്തിലും സുരക്ഷാ വിഷയങ്ങളിലും മികച്ച റെക്കോർഡുള്ള ഒരു രാജ്യമാണ്. ഞങ്ങൾ യുദ്ധങ്ങളിൽ പങ്കെടുക്കുകയോ ആസൂത്രണം ചെയ്യുകയോ ചെയ്യുന്നില്ല. ചൈന സമാധാന ചർച്ചകളെ പ്രോത്സാഹിപ്പിക്കുകയും സംഭാഷണത്തിലൂടെ പ്രശ്നങ്ങൾക്ക് രാഷ്ട്രീയ പരിഹാരം കാണാൻ ശ്രമിക്കുകയും ചെയ്യുന്നു," ഗ്ലോബൽ ടൈംസ് റിപ്പോർട്ട് ചെയ്തു.

യുക്രെയ്ൻ സംഘർഷം അവസാനിപ്പിക്കാൻ സഹായിക്കുന്നതിനായി റഷ്യയിൽ നിന്ന് എണ്ണ വാങ്ങുന്നത് നിർത്താനും, ചൈനയ്ക്ക് മേൽ 50 മുതൽ 100 ശതമാനം വരെ താരിഫ് ചുമത്താനും ശനിയാഴ്ച ട്രംപ് നാറ്റോ രാജ്യങ്ങളോട് ആവശ്യപ്പെട്ടിരുന്നു. റഷ്യൻ എണ്ണ വാങ്ങുന്ന ഇന്ത്യ, ചൈന തുടങ്ങിയ രാജ്യങ്ങൾക്കെതിരെ താരിഫ് ചുമത്താൻ ജി7 രാജ്യങ്ങളോട് യുഎസ് ആവശ്യപ്പെട്ടതിന് പിന്നാലെയാണ് ട്രംപിന്റെ ഈ പ്രതികരണം.

നേരത്തെ റഷ്യയിൽ നിന്ന് എണ്ണ വാങ്ങിയതിന്റെ പേരിൽ ഇന്ത്യയ്ക്ക് മേൽ 50 ശതമാനം താരിഫ് ഏർപ്പെടുത്തിയ ട്രംപ് ഭരണകൂടത്തിന്റെ നീക്കം ഇന്ത്യ-അമേരിക്ക ബന്ധത്തെ ദോഷകരമായി ബാധിച്ചിരുന്നു.

എല്ലാ നാറ്റോ രാജ്യങ്ങളും റഷ്യയിൽ നിന്ന് എണ്ണ വാങ്ങുന്നത് നിർത്തിയാൽ റഷ്യയ്ക്കെതിരെ "വലിയ ഉപരോധങ്ങൾ" ഏർപ്പെടുത്താൻ താൻ തയ്യാറാണെന്ന് ട്രംപ് പറഞ്ഞു. ചില രാജ്യങ്ങൾ റഷ്യയിൽ നിന്ന് എണ്ണ വാങ്ങുന്നത് "ഞെട്ടിക്കുന്നതാണ്" എന്നും അദ്ദേഹം കൂട്ടിച്ചേർത്തു. ചൈനയ്ക്ക് റഷ്യക്ക് മേൽ ശക്തമായ നിയന്ത്രണമുണ്ടെന്നും ഈ താരിഫുകൾ ആ പിടി അയയ്ക്കാൻ സഹായിക്കുമെന്നും ട്രംപ് പറഞ്ഞു.

യുക്രെയ്ൻ യുദ്ധം "തന്റെ സംഘർഷമല്ലെന്നും" താൻ പ്രസിഡന്റായിരുന്നെങ്കിൽ അത് ഒരിക്കലും ആരംഭിക്കില്ലായിരുന്നെന്നും ട്രംപ് അവകാശപ്പെട്ടു. "ഇത് ബൈഡന്റെയും സെലൻസ്കിയുടെയും യുദ്ധമാണ്. ഈ യുദ്ധം അവസാനിപ്പിക്കാനും റഷ്യൻ, ഉക്രേനിയൻ ജീവിതങ്ങൾ രക്ഷിക്കാനും സഹായിക്കാനാണ് ഞാൻ ഇവിടെയുള്ളത്," ട്രംപ് പറഞ്ഞു. "നാറ്റോ ഞാൻ പറയുന്നത് പോലെ ചെയ്താൽ യുദ്ധം വേഗം അവസാനിക്കും. അല്ലെങ്കിൽ, നിങ്ങൾ എന്റെയും യു.എസിന്റെയും സമയവും ഊർജവും പണവും പാഴാക്കുകയാണ്," അദ്ദേഹം കൂട്ടിച്ചേർത്തു.