കൊച്ചി: മുതിർന്ന കോൺഗ്രസ് നേതാവും മുൻ നിയമസഭാ സ്പീക്കറുമായ പി.പി. തങ്കച്ചൻ (86) അന്തരിച്ചു. വാർധക്യസഹജമായ അസുഖങ്ങളെ തുടർന്ന് ഇന്ന് വൈകിട്ട് നാലരയോടെ ആലുവയിലെ സ്വകാര്യ ആശുപത്രിയിലായിരുന്നു അന്ത്യം.

ഏ കെ ആന്റണി മന്ത്രിസഭയിൽ കൃഷിമന്ത്രിയായിരുന്ന പി.പി. തങ്കച്ചൻ നാല് തവണ എംഎൽഎയായി പ്രവർത്തിച്ചിട്ടുണ്ട്. 1968-ൽ 29-ാം വയസ്സിൽ പെരുമ്പാവൂർ നഗരസഭാ ചെയർമാനായി തിരഞ്ഞെടുക്കപ്പെട്ടതോടെയാണ് അദ്ദേഹം പൊതുപ്രവർത്തന രംഗത്ത് ശ്രദ്ധേയനാകുന്നത്. രാജ്യത്തെ ഏറ്റവും പ്രായം കുറഞ്ഞ നഗരസഭാ ചെയർമാൻ എന്ന ബഹുമതിയും അദ്ദേഹത്തിന് സ്വന്തമായി.

1982-ൽ പെരുമ്പാവൂരിൽ നിന്ന് നിയമസഭയിലേക്ക് മത്സരിച്ച് സി.പി.എം സ്ഥാനാർത്ഥിയെ തോൽപ്പിച്ച് ആദ്യ വിജയം നേടി. തുടർന്ന് 1987, 1991, 1996 വർഷങ്ങളിൽ പെരുമ്പാവൂർ മണ്ഡലത്തെ പ്രതിനിധീകരിച്ച് അദ്ദേഹം നിയമസഭയിലെത്തി. 2001-ൽ സാജു പോളിനോടും 2006-ൽ കുന്നത്തുനാട്ടിൽ നിന്ന് മത്സരിച്ചപ്പോഴും പരാജയപ്പെട്ടു.

നീണ്ട 13 വർഷം യുഡിഎഫ് കൺവീനർ പദവി വഹിച്ച പി.പി. തങ്കച്ചൻ കേരള രാഷ്ട്രീയത്തിലെ ശ്രദ്ധേയമായ വ്യക്തിത്വമായിരുന്നു. 2005-ൽ എ.കെ. ആന്റണിക്ക് പകരക്കാരനായി ഉമ്മൻചാണ്ടി മുഖ്യമന്ത്രിയായപ്പോൾ യുഡിഎഫ് കൺവീനർ പദവി ഏറ്റെടുത്തത് തങ്കച്ചനായിരുന്നു. രാഷ്ട്രീയത്തിലെ അനുഭവസമ്പത്തും സൗഹാർദപരമായ നിലപാടും യുഡിഎഫിനെ കെട്ടുറപ്പോടെ നയിക്കാൻ അദ്ദേഹത്തെ സഹായിച്ചു.

നിരവധി ട്രേഡ് യൂണിയനുകളുടെ പ്രസിഡന്റായും കേരള മാർക്കറ്റ് ഫെഡിന്റെ ചെയർമാനായും അദ്ദേഹം പ്രവർത്തിച്ചിട്ടുണ്ട്. 1939 ജൂലൈ 29-ന് അങ്കമാലിയിൽ റവ. ഫാദർ പൗലോസ് പൈനാടത്തിന്റെയും അന്നമ്മയുടെയും മകനായാണ് അദ്ദേഹം ജനിച്ചത്.