സനാ: ഖത്തറിൽ നടത്തിയ ആക്രമണത്തിന് പിന്നാലെ യെമെനിലും ഇസ്രായേൽ വ്യോമാക്രമണം. യെമെൻ തലസ്ഥാനമായ സനായിലും അൽ ജൗഫ് ഗവർണറേറ്റിലും ഉണ്ടായ ആക്രമണത്തിൽ 35 പേർ കൊല്ലപ്പെടുകയും നിരവധി പേർക്ക് പരിക്കേൽക്കുകയും ചെയ്തു. ഇത് പ്രാഥമിക കണക്കുകൾ മാത്രമാണെന്നും, രക്ഷാപ്രവർത്തനം തുടരുകയാണെന്നും യെമെൻ മന്ത്രാലയം അറിയിച്ചു.

സാധാരണക്കാർ താമസിക്കുന്ന ജനവാസ കേന്ദ്രങ്ങളിലാണ് ആക്രമണമുണ്ടായത്. സനായിലെ അൽ-തഹ്രീർ, 60-ാം സ്ട്രീറ്റിലെ ഒരു മെഡിക്കൽ സ്ഥാപനം, അൽ-ജൗഫിന്റെ തലസ്ഥാനമായ അൽ-ഹസ്മിലെ സർക്കാർ കോമ്പൗണ്ട് എന്നിവിടങ്ങളിലെല്ലാം ആക്രമണം നടന്നു. സനായുടെ തെക്കുപടിഞ്ഞാറുള്ള ആരോഗ്യമേഖലയിലെ ഒരു മെഡിക്കൽ സ്ഥാപനത്തിനുനേരെയും ആക്രമണമുണ്ടായതായി ഹൂതി നിയന്ത്രണത്തിലുള്ള അൽ മസിറ ടിവി റിപ്പോർട്ട് ചെയ്തു.

ഇസ്രായേൽ ജെറ്റുകൾക്കെതിരെ തങ്ങളുടെ മിസൈലുകൾ ഉപയോഗിച്ചതായും, ചില ജെറ്റുകൾ ആക്രമണം നടത്താതെ മടങ്ങിയതായും ഹൂതി സൈനിക വക്താവ് യഹ്യ സരീ പറഞ്ഞു. ഇസ്രായേലിനുനേരെ നടത്തുന്ന ആക്രമണങ്ങൾക്കുള്ള മറുപടിയാണ് യെമെനിലെ ആക്രമണമെന്ന് ഐഡിഎഫ് (ഇസ്രായേൽ പ്രതിരോധ സേന) പ്രതികരിച്ചു.

യെമെൻ പ്രസിഡന്റിന്റെ കൊട്ടാര സമുച്ചയത്തിലെ സൈനിക കേന്ദ്രങ്ങളിലൊന്നാണ് ബോംബാക്രമണം നടത്തിയതെന്നാണ് ഇസ്രായേലിന്റെ അവകാശവാദം. തലസ്ഥാനമായ സനായിലെ പവർ പ്ലാന്റ്, ഗ്യാസ് സ്റ്റേഷൻ എന്നിവയ്ക്കും ആക്രമണത്തിൽ നാശനഷ്ടങ്ങൾ സംഭവിച്ചു.