കൊച്ചി: യുവ ഡോക്ടർ നൽകിയ ബലാത്സംഗ പരാതിയിൽ റാപ്പർ വേടൻ അറസ്റ്റിലായി. തൃക്കാക്കര എസിപിയുടെ നേതൃത്വത്തിൽ നടന്ന ചോദ്യം ചെയ്യലിന് ശേഷമാണ് അറസ്റ്റ് രേഖപ്പെടുത്തിയത്. എന്നാൽ, ഈ കേസിൽ ഹൈക്കോടതി വേടന് മുൻകൂർ ജാമ്യം അനുവദിച്ചിട്ടുള്ളതിനാൽ, അറസ്റ്റിന് ശേഷം ജാമ്യത്തിൽ വിട്ടയച്ചു.

ബലാത്സംഗ പരാതിയിൽ ചോദ്യം ചെയ്യലിനായി വേടൻ ഇന്നും ഇന്നലെയും തൃക്കാക്കര പോലീസ് സ്റ്റേഷനിൽ ഹാജരായിരുന്നു. ഇന്നലെ ആറ് മണിക്കൂറോളം പോലീസ് അദ്ദേഹത്തെ ചോദ്യം ചെയ്തു. പോലീസ് ശേഖരിച്ച തെളിവുകൾ നിരത്തിയായിരുന്നു ചോദ്യം ചെയ്യൽ. അന്വേഷണവുമായി വേടൻ സഹകരിക്കുന്നതായി പോലീസ് വ്യക്തമാക്കിയിരുന്നു.

2021-നും 2023-നും ഇടയിൽ അഞ്ചുതവണ തന്നെ വേടൻ ബലാത്സംഗം ചെയ്തതായും മുപ്പതിനായിരം രൂപ കൈക്കലാക്കിയതായും യുവതി നൽകിയ പരാതിയിൽ പറയുന്നു. അതേസമയം, മുഖ്യമന്ത്രിക്ക് ലഭിച്ച മറ്റൊരു ലൈംഗിക അതിക്രമ പരാതിയുമായി ബന്ധപ്പെട്ട് എറണാകുളം സെൻട്രൽ സ്റ്റേഷനിൽ രജിസ്റ്റർ ചെയ്ത കേസിലും വേടന് ജാമ്യം ലഭിച്ചു. എറണാകുളം ജില്ലാ മജിസ്ട്രേറ്റ് കോടതിയാണ് ഈ കേസിൽ ജാമ്യം അനുവദിച്ചത്.