തിരുവനന്തപുരം: ആഗോള അയ്യപ്പ സംഗമത്തിൽ പങ്കെടുക്കുമോ എന്ന മാധ്യമപ്രവർത്തകരുടെ ചോദ്യത്തിന് നേരിട്ട് പ്രതികരിക്കാതെ കേന്ദ്രമന്ത്രി സുരേഷ് ഗോപി. "ഞാൻ ഒരു മന്ത്രിയാണ്" എന്നായിരുന്നു അദ്ദേഹത്തിന്റെ മറുപടി. സേവാഭാരതിയുടെ നേതൃത്വത്തിൽ മെഡിക്കൽ കോളേജിൽ നടന്ന ഒരു പരിപാടിയിൽ പങ്കെടുക്കാനെത്തിയപ്പോഴാണ് മന്ത്രിയോട് മാധ്യമങ്ങൾ ചോദ്യം ഉന്നയിച്ചത്.

സംസ്ഥാന സർക്കാരിന്റെ നിയന്ത്രണത്തിൽ നടക്കുന്ന അയ്യപ്പ സംഗമത്തിനെതിരെ ബിജെപി വ്യാപകമായ വിമർശനം ഉന്നയിക്കുന്ന സാഹചര്യത്തിലാണ് സുരേഷ് ഗോപിയുടെ സാന്നിധ്യം സംബന്ധിച്ച് ചോദ്യം ഉയർന്നത്.

കഴിഞ്ഞ ദിവസം ദേവസ്വം ബോർഡ് പ്രസിഡന്റ് പി.എസ്. പ്രശാന്ത്, സുരേഷ് ഗോപിയുടെ വീട്ടിലെത്തി അദ്ദേഹത്തെ സംഗമത്തിലേക്ക് ക്ഷണിച്ചിരുന്നു. കേരളത്തിൽ നിന്നുള്ള രണ്ട് കേന്ദ്രമന്ത്രിമാരെയും മറ്റ് നാല് കേന്ദ്രമന്ത്രിമാരെയും സംഗമത്തിലേക്ക് ക്ഷണിക്കുമെന്ന് സംഘാടകർ നേരത്തെ അറിയിച്ചിരുന്നു.