യുഎസ് പ്രസിഡന്‍റ് ഡൊണാൾഡ് ട്രംപിന്‍റെ സമീപകാല പ്രസ്താവന അന്താരാഷ്ട്ര ബന്ധങ്ങളിൽ പുതിയ ചർച്ചകൾക്ക് തിരികൊളുത്തിയിരിക്കുകയാണ്. 'ഇന്ത്യയെയും റഷ്യയെയും നമ്മൾ കൂടുതൽ ഇരുണ്ട ചൈനയിലേക്ക് നഷ്ടപ്പെടുത്തി, മൂന്ന് രാജ്യങ്ങൾക്കും സമ്പദ് സമൃദ്ധി നേരുന്നു' എന്ന ട്രംപിന്‍റെ പരാമർശം, മൂന്ന് രാജ്യങ്ങളും തമ്മിലുള്ള ബന്ധത്തിൽ ആശങ്കയുണ്ടെന്ന് സൂചിപ്പിക്കുന്നു.
ചൈനയിലെ ടിയാൻജിനിൽ നടന്ന ഷാങ്ഹായ് കോർപ്പറേഷൻ ഓർഗനൈസേഷൻ (എസ്‍സിഒ) ഉച്ചകോടിയിൽ ഇന്ത്യൻ പ്രധാനമന്ത്രി നരേന്ദ്ര മോദി, റഷ്യൻ പ്രസിഡന്‍റ് വ്‌ളാഡിമിർ പുടിൻ, ചൈനീസ് പ്രസിഡന്‍റ് ഷി ജിൻപിംഗ് എന്നിവർ ഒരുമിച്ചു നിൽക്കുന്ന ചിത്രം പങ്കുവെച്ചുകൊണ്ടാണ് ട്രംപിന്‍റെ പ്രതികരണം.
ട്രംപിന്‍റെ ഈ പ്രസ്താവന, ഇന്ത്യയും അമേരിക്കയും തമ്മിലുള്ള ഉഭയകക്ഷി ബന്ധം വഷളായ പശ്ചാത്തലത്തിൽ കൂടുതൽ പ്രാധാന്യമർഹിക്കുന്നു. കഴിഞ്ഞ മാസം ട്രംപ് ഭരണകൂടം ഇന്ത്യയുടെ ഉത്പന്നങ്ങൾക്ക് 50% അധിക നികുതി (താരിഫ്) ഏർപ്പെടുത്തിയതിന് പിന്നാലെയാണ് ഈ സംഭവം. ഇത് ഇരു രാജ്യങ്ങളും തമ്മിലുള്ള വ്യാപാര ബന്ധങ്ങളെ സാരമായി ബാധിച്ചിരുന്നു.
ലോക നേതാക്കൾ ഒരുമിച്ചു നിൽക്കുന്ന ചിത്രം ട്രംപ് തന്‍റെ സോഷ്യൽ മീഡിയ പ്ലാറ്റ്‌ഫോമായ ട്രൂത്ത് സോഷ്യലിൽ പങ്കുവെച്ചതിനൊപ്പം 'അവർക്ക് ദീർഘവും സമൃദ്ധവുമായ ഒരു ഭാവി ഉണ്ടാകട്ടെ' എന്ന് പരിഹാസരൂപേണ ആശംസിക്കുകയും ചെയ്തു. ചൈനീസ് പ്രസിഡന്‍റ് ഷി ജിൻപിംഗ് ആതിഥേയത്വം വഹിച്ച എസ്‍സിഒ ഉച്ചകോടിയിൽ ലോകത്തിലെ പ്രമുഖ നേതാക്കൾ പങ്കെടുത്തിരുന്നു. ഇത് ആഗോള തലത്തിൽ രാജ്യങ്ങൾക്കിടയിലുള്ള സൗഹൃദങ്ങളെയും സഖ്യങ്ങളെയും കുറിച്ചുള്ള ചർച്ചകൾക്ക് വീണ്ടും വഴിയൊരുക്കിയിരിക്കുകയാണ്.