വാഷിങ്ടൺ: ഇന്ത്യയുമായി അമേരിക്കക്ക് വളരെ നല്ല ബന്ധമുണ്ടെന്ന് യുഎസ് പ്രസിഡന്റ് ഡൊണാൾഡ് ട്രംപ്. എന്നാൽ, ഇന്ത്യ അമേരിക്കയിൽ നിന്ന് ഇറക്കുമതി ചെയ്യുന്ന ഉത്പന്നങ്ങൾക്ക് ഉയർന്ന നികുതി ചുമത്തുന്നുണ്ടെന്നും ഇത് ഏകപക്ഷീയമായ ബന്ധമാണെന്നും അദ്ദേഹം പറഞ്ഞു.

ഇന്ത്യയ്ക്ക് മേൽ ചുമത്തിയിട്ടുള്ള നികുതികൾ കുറയ്ക്കാൻ ഉദ്ദേശിക്കുന്നുണ്ടോ എന്ന ചോദ്യത്തിന് മറുപടിയായാണ് ട്രംപ് വൈറ്റ് ഹൗസിൽവെച്ച് ഇക്കാര്യം പറഞ്ഞത്. ഇന്ത്യക്ക് മേൽ 50 ശതമാനം നികുതി ഏർപ്പെടുത്തിയതിന് പിന്നാലെ ഇരു രാജ്യങ്ങളും തമ്മിലുള്ള ബന്ധത്തിൽ അസ്വാരസ്യങ്ങൾ നിലനിൽക്കുന്നുണ്ട്.

വർഷങ്ങളായി ഇന്ത്യയും അമേരിക്കയും തമ്മിലുള്ള ബന്ധം ഏകപക്ഷീയമാണെന്നും, താൻ അധികാരമേറ്റെടുത്തതിന് ശേഷം അതിൽ മാറ്റങ്ങൾ വരുത്തിയെന്നും ട്രംപ് പറഞ്ഞു. "ഇന്ത്യ ലോകത്തിലെ ഏറ്റവും ഉയർന്ന നികുതികളാണ് ഞങ്ങളിൽ നിന്ന് ഈടാക്കിയിരുന്നത്," ട്രംപ് കൂട്ടിച്ചേർത്തു.

അമേരിക്കയിൽ നിന്ന് ഇന്ത്യയിലേക്ക് ഉത്പന്നങ്ങൾ കയറ്റുമതി ചെയ്യുന്നതിന് 100% നികുതി ഈടാക്കിയിരുന്നതിനാൽ വലിയ തോതിലുള്ള വ്യാപാരം നടന്നിരുന്നില്ല. എന്നാൽ, അമേരിക്ക ഇന്ത്യയിൽ നിന്ന് വരുന്ന ഉത്പന്നങ്ങൾക്ക് നികുതി ഈടാക്കിയിരുന്നില്ല. ഇത്തരത്തിൽ ഇന്ത്യ ഉത്പന്നങ്ങൾ അമേരിക്കയിലേക്ക് ഇറക്കുമതി ചെയ്യുകയായിരുന്നെന്നും ട്രംപ് പറഞ്ഞു.

ഹാർലി ഡേവിഡ്സൺ മോട്ടോർസൈക്കിളുകളുടെ ഉദാഹരണം ചൂണ്ടിക്കാട്ടി, 200 ശതമാനം നികുതി കാരണം കമ്പനിക്ക് ഇന്ത്യയിൽ മോട്ടോർസൈക്കിളുകൾ വിൽക്കാൻ കഴിഞ്ഞിരുന്നില്ലെന്ന് ട്രംപ് പറഞ്ഞു. "അതുകൊണ്ട് ഹാർലി ഡേവിഡ്സൺ ഇന്ത്യയിൽ പോയി ഒരു മോട്ടോർസൈക്കിൾ പ്ലാന്റ് സ്ഥാപിച്ചു. ഇപ്പോൾ അവർക്ക് നികുതി നൽകേണ്ടതില്ല, ഞങ്ങളുടെ കാര്യത്തിലും ഇത് തന്നെയാണ് സംഭവിക്കുന്നത്." അദ്ദേഹം കൂട്ടിച്ചേർത്തു.

ഇന്ത്യ തങ്ങളുടെ നികുതികൾ കുറയ്ക്കാമെന്ന് വാഗ്ദാനം ചെയ്തിട്ടുണ്ടെങ്കിലും, അത് വളരെ വൈകിപ്പോയെന്ന് ട്രംപ് തിങ്കളാഴ്ച പറഞ്ഞിരുന്നു. ഇന്ത്യ തങ്ങളുടെ എണ്ണയുടെയും സൈനിക ഉത്പന്നങ്ങളുടെയും ഭൂരിഭാഗവും റഷ്യയിൽ നിന്നാണ് വാങ്ങുന്നതെന്നും അമേരിക്കയിൽ നിന്ന് വളരെ കുറച്ച് മാത്രമാണ് വാങ്ങുന്നതെന്നും ട്രംപ് ചൂണ്ടിക്കാട്ടി.

ട്രംപ് ഭരണകൂടം ഇന്ത്യക്ക് മേൽ 25 ശതമാനം പരസ്പര നികുതിയും, റഷ്യൻ എണ്ണ വാങ്ങുന്നതിന് അധികമായി 25 ശതമാനം നികുതിയും ചുമത്തിയിട്ടുണ്ട്. ഇതോടെ ഇന്ത്യയ്ക്ക് മേൽ ചുമത്തിയ നികുതികൾ ഓഗസ്റ്റ് 27 മുതൽ 50 ശതമാനമായി വർദ്ധിച്ചു.

അതേസമയം, കർഷകരുടെയും ചെറുകിട വ്യവസായികളുടെയും താൽപര്യങ്ങൾ ഒരുതരത്തിലും വിട്ടുവീഴ്ച ചെയ്യാൻ കഴിയില്ലെന്ന് പ്രധാനമന്ത്രി നരേന്ദ്ര മോദി പറഞ്ഞു. "ഞങ്ങൾക്ക് മേലുള്ള സമ്മർദ്ദം വർദ്ധിച്ചേക്കാം, പക്ഷേ ഞങ്ങൾ അത് സഹിക്കും," അദ്ദേഹം കൂട്ടിച്ചേർത്തു.

യുഎസ് ചുമത്തിയ നികുതികൾ "ന്യായീകരിക്കാൻ കഴിയാത്തതും യുക്തിരഹിതവുമാണ്" എന്ന് ഇന്ത്യ പ്രതികരിച്ചു. മറ്റ് പ്രമുഖ രാജ്യങ്ങളെപ്പോലെ തങ്ങളുടെ ദേശീയ താൽപ്പര്യങ്ങളും സാമ്പത്തിക സുരക്ഷയും സംരക്ഷിക്കാൻ ആവശ്യമായ എല്ലാ നടപടികളും സ്വീകരിക്കുമെന്ന് ന്യൂഡൽഹി വ്യക്തമാക്കി. 2024-25 കാലഘട്ടത്തിൽ ഇരു രാജ്യങ്ങളും തമ്മിലുള്ള ഉഭയകക്ഷി വ്യാപാരം 131.8 ബില്യൺ ഡോളറായിരുന്നു (86.5 ബില്യൺ ഡോളർ കയറ്റുമതിയും 45.3 ബില്യൺ ഡോളർ ഇറക്കുമതിയും).