യുഎസ് പ്രസിഡന്റ് ഡൊണാൾഡ് ട്രംപിനെതിരെ ഗുരുതരമായ ആരോപണവുമായി മുൻ യുഎസ് ദേശീയ സുരക്ഷാ ഉപദേഷ്ടാവ് ജെയ്ക്ക് സള്ളിവൻ. പാക്കിസ്ഥാനിലെ സ്വന്തം കുടുംബ ബിസിനസിന്റെ വളർച്ചയ്ക്കുവേണ്ടി ട്രംപ് ഇന്ത്യയുമായുള്ള ബന്ധം തകർത്തു എന്നാണ് സള്ളിവൻ ആരോപിച്ചത്. ട്രംപിന്റെ വിദേശ നയങ്ങളിൽ അധികം ശ്രദ്ധിക്കപ്പെടാത്ത ഒന്നാണ് ഇന്ത്യയുമായുള്ള ബന്ധം ദുർബലപ്പെടുത്തിയത് എന്നും അദ്ദേഹം ചൂണ്ടിക്കാട്ടി.

'മെയ്ഡസ് ടച്ച്' എന്ന യൂട്യൂബ് ചാനലിന് നൽകിയ അഭിമുഖത്തിലാണ് ബൈഡൻ ഭരണകാലത്തെ ഉദ്യോഗസ്ഥനായ ജെയ്ക്ക് സള്ളിവൻ ഈ ആരോപണങ്ങൾ ഉന്നയിച്ചത്. ഇന്ത്യയുമായുള്ള ബന്ധം ദുർബലപ്പെടുത്തിയത് ട്രംപിന്റെ വിദേശ നയങ്ങളിൽ അധികം ശ്രദ്ധിക്കപ്പെടാത്ത ഒന്നാണെന്നും അദ്ദേഹം കൂട്ടിച്ചേർത്തു.

ഉഭയകക്ഷി ബന്ധത്തിലൂടെ ലോകത്തിലെ ഏറ്റവും വലിയ ജനാധിപത്യ രാജ്യമായ ഇന്ത്യയുമായി പതിറ്റാണ്ടുകളായി യുഎസ് ബന്ധം ശക്തിപ്പെടുത്തിയിട്ടുണ്ടെന്ന് ജെയ്ക്ക് സള്ളിവൻ പറഞ്ഞു. സാങ്കേതികവിദ്യ, കഴിവുകൾ, സാമ്പത്തികം, ചൈനയോടുള്ള പ്രതിരോധം തുടങ്ങിയ മേഖലകളിൽ ഇന്ത്യയുമായുള്ള ബന്ധം വഴി വലിയ പുരോഗതി നേടാൻ കഴിഞ്ഞിട്ടുണ്ടെന്നും അദ്ദേഹം കൂട്ടിച്ചേർത്തു.

എന്നാൽ ഇപ്പോൾ അതെല്ലാം മാറി. ഈ മാറ്റങ്ങൾക്ക് പിന്നിൽ ട്രംപിന്റെ കുടുംബ ബിസിനസ് ഇടപാടുകളാണെന്ന് സള്ളിവൻ ആരോപിക്കുന്നു. പാകിസ്താൻ ട്രംപിന്റെ കുടുംബ ബിസിനസ് ഇടപാടുകളിൽ സഹകരിക്കാമെന്ന് ഉറപ്പ് നൽകിയതുകൊണ്ടാണ് ഇന്ത്യയുമായുള്ള ബന്ധം തകർത്തതെന്ന് അദ്ദേഹം പറഞ്ഞു. ഇന്ത്യ-യുഎസ് സഹകരണം അമേരിക്കയുടെ ദേശീയ താൽപ്പര്യങ്ങൾ സംരക്ഷിച്ചിരുന്നതിനാൽ ഇത് ഒരു വലിയ തന്ത്രപരമായ തിരിച്ചടിയാണെന്നും അദ്ദേഹം കൂട്ടിച്ചേർത്തു.