അമേരിക്കൻ പ്രസിഡന്റ് ഡോണൾഡ് ട്രംപ് ഇന്ത്യയ്ക്കെതിരെ പുതിയ സമ്മർദതന്ത്രവുമായി രംഗത്ത്. യുഎസിന്റെ തീരുവ ഭീഷണിയെ നേരിടാൻ റഷ്യയോടും ചൈനയോടും ഇന്ത്യ അടുക്കുന്നതിനിടയിലാണ് ഈ നീക്കം. ഇന്ത്യയ്ക്കെതിരെ ഉപരോധം ഏർപ്പെടുത്താൻ യൂറോപ്യൻ യൂണിയൻ രാജ്യങ്ങളോട് വൈറ്റ് ഹൗസ് ആവശ്യപ്പെട്ടതായി ദേശീയ മാധ്യമങ്ങൾ റിപ്പോർട്ട് ചെയ്യുന്നു.

ഇന്ത്യയിൽനിന്നുള്ള എണ്ണയുടെയും പ്രകൃതിവാതകത്തിന്റെയും ഇറക്കുമതി നിർത്തിവെക്കുന്നതുൾപ്പെടെയുള്ള ഉപരോധങ്ങളാണ് യുഎസ് മുന്നോട്ട് വെച്ചിട്ടുള്ളത്. ഇന്ത്യയ്ക്ക് അധിക തീരുവ ഏർപ്പെടുത്തണമെന്നും ട്രംപ് നിർദേശിച്ചതായി റിപ്പോർട്ടുകളുണ്ട്. റഷ്യയിൽ നിന്ന് എണ്ണ വാങ്ങുന്നത് തുടരുന്നതിനാലാണ് ഇന്ത്യയ്ക്ക് യുഎസ് അധിക തീരുവ ചുമത്തിയത്. എന്നാൽ, റഷ്യയിൽനിന്ന് ഇന്ത്യ എണ്ണ വാങ്ങുന്നതിനെ യൂറോപ്യൻ യൂണിയൻ രാജ്യങ്ങൾ ഇതുവരെ പരസ്യമായി എതിർത്തിട്ടില്ല.

കൂടാതെ, ഇന്ത്യയ്ക്ക് അധിക തീരുവ ചുമത്താനുള്ള ട്രംപിന്റെ തീരുമാനത്തെ യൂറോപ്യൻ രാജ്യങ്ങൾ പിന്തുണയ്ക്കുകയോ തള്ളിപ്പറയുകയോ ചെയ്തിട്ടില്ല. റഷ്യയിൽനിന്ന് ഏറ്റവും കൂടുതൽ എണ്ണ വാങ്ങുന്നത് ചൈനയാണ്. യൂറോപ്പും റഷ്യയിൽനിന്ന് എണ്ണ വാങ്ങിയിട്ടുണ്ട്. എന്നാൽ, ചൈനയെയും യൂറോപ്പിനെയും ഒഴിവാക്കി ഇന്ത്യയെ മാത്രം ട്രംപ് ശിക്ഷിച്ചത് ഇരട്ടത്താപ്പാണെന്ന് ഇന്ത്യ പ്രതികരിച്ചിരുന്നു.