ആലപ്പുഴ: ആവേശകരമായ 71-ാമത് നെഹ്‌റു ട്രോഫി വള്ളംകളിയിൽ വീയപുരം ചുണ്ടൻ ജേതാക്കളായി. ആവേശകരമായ ഫൈനൽ പോരാട്ടത്തിൽ നടുഭാഗം ചുണ്ടനെ പിന്തള്ളിയാണ് വീയപുരം ചുണ്ടൻ കിരീടം നേടിയത്. വില്ലേജ് ബോട്ട് ക്ലബ്ബ് കൈനകരിയാണ് വീയപുരം ചുണ്ടൻ തുഴഞ്ഞത്. പുന്നമട ബോട്ട് ക്ലബ്ബ് തുഴഞ്ഞ നടുഭാഗം ചുണ്ടൻ രണ്ടാം സ്ഥാനം നേടി.

ഹീറ്റ്സിൽ മികച്ച സമയം കുറിച്ച നടുഭാഗം, നിരണം, മേൽപ്പാടം, വീയപുരം ചുണ്ടൻ വള്ളങ്ങളാണ് ഫൈനൽ പോരാട്ടത്തിൽ മാറ്റുരച്ചത്. ആറാം ഹീറ്റ്സിൽ ഒന്നാമതെത്തിയാണ് വീയപുരം ചുണ്ടൻ ഫൈനലിൽ പ്രവേശിച്ചത്. അതേസമയം, നാലാം ഹീറ്റ്സിൽ ഒന്നാം സ്ഥാനം നേടി നടുഭാഗം ചുണ്ടൻ ഫൈനലിലേക്ക് മുന്നേറി. മൂന്നാം ഹീറ്റ്സിൽ ഒന്നാമതെത്തിയ മേൽപ്പാടം ചുണ്ടൻ ഫൈനൽ പോരാട്ടത്തിന് യോഗ്യത നേടി. എന്നാൽ, അഞ്ചാം ഹീറ്റ്സിൽ ഒന്നാമതെത്തിയ പായിപ്പാടൻ ചുണ്ടനും ആദ്യ ഹീറ്റ്സിൽ ഒന്നാമതെത്തിയ കാരിച്ചാൽ ചുണ്ടനും ഫൈനൽ കാണാതെ പുറത്തായി.