മിനിയാപൊളിസ്: മിനിയാപൊളിസിലെ അനൻസിയേഷൻ കാത്തലിക് സ്കൂളിൽ വെടിവെപ്പ്. വിശുദ്ധ കുർബാനയ്ക്കിടെ പള്ളിയിലേക്ക് അക്രമി ജനലിലൂടെ വെടിയുതിർക്കുകയായിരുന്നു. സംഭവത്തിൽ എട്ടും പത്തും വയസ്സുള്ള രണ്ട് കുട്ടികൾ കൊല്ലപ്പെട്ടു. 14 കുട്ടികളടക്കം 17 പേർക്ക് പരിക്കേറ്റു. ഇതിൽ രണ്ട് കുട്ടികളുടെ നില അതീവ ഗുരുതരമാണെന്ന് പോലീസ് അറിയിച്ചു.

സ്വയം വെടിവെച്ചാണ് അക്രമി മരിച്ചതെന്ന് മിനിയാപൊളിസ് പോലീസ് മേധാവി ബ്രയാൻ ഒ'ഹാറ പറഞ്ഞു. രാവിലെ 8:30-നാണ് സംഭവം. കെട്ടിടത്തിന്റെ വശത്തേക്ക് വന്ന അക്രമി, പള്ളിയിലെ ജനലുകളിലൂടെ കുട്ടികൾക്കും മറ്റ് വിശ്വാസികൾക്കും നേരെ വെടിയുതിർക്കുകയായിരുന്നു.

നിരവധി റൗണ്ട് വെടിവെപ്പുണ്ടായെന്നും നിഷ്കളങ്കരായ കുട്ടികൾക്കും ആരാധനയിൽ പങ്കെടുത്തവർക്കും നേരെയുള്ള ആസൂത്രിതമായ ആക്രമണമാണിതെന്നും പോലീസ് മേധാവി പറഞ്ഞു. വെടിവെപ്പ് നടന്ന സ്റ്റെയ്‌ൻഡ് ഗ്ലാസ് ജനലിന് സമീപമായിരുന്നു താനിരുന്നതെന്ന് വെടിവെപ്പിൽ പരിക്കേറ്റ പത്തുവയസ്സുകാരൻ വെസ്റ്റൺ പറഞ്ഞു.

"വെടിയുണ്ടകൾ എന്റെ രണ്ട് അടി അകലെയായിരുന്നു," വെസ്റ്റൺ പറഞ്ഞു. വെടിവെപ്പ് കേട്ടപ്പോൾ തന്നെ താനും സഹപാഠികളും പള്ളിയുടെ ബെഞ്ചിനടിയിൽ ഒളിച്ചെന്നും അദ്ദേഹം കൂട്ടിച്ചേർത്തു.

"എന്റെ കൂട്ടുകാരന് പുറകിൽ വെടിയേറ്റു, അവൻ ഇപ്പോൾ ആശുപത്രിയിലാണ്. അവനെക്കുറിച്ച് ഓർത്ത് എനിക്ക് വലിയ ഭയമുണ്ടായിരുന്നു. അവൻ ഇപ്പോൾ സുരക്ഷിതനാണെന്ന് കരുതുന്നു," വെസ്റ്റൺ കൂട്ടിച്ചേർത്തു.

വെടിവെപ്പ് നടക്കുമ്പോൾ തന്റെ അമ്മ പള്ളിയുടെ പുറത്തുണ്ടായിരുന്നെന്നും, പള്ളിയിൽ നിന്ന് പുറത്തുവന്നപ്പോൾ ആദ്യം കണ്ടത് അമ്മയെയാണെന്നും വെസ്റ്റൺ പറഞ്ഞു. "എനിക്ക് ഇനി അമ്മയെ കാണാൻ കഴിയില്ലെന്ന് ഭയന്നിരുന്നു," വെസ്റ്റൺ പറഞ്ഞു.