കോട്ടയം: പാലായിലെ സെന്റ് ജോസഫ് ഇൻസ്റ്റിറ്റ്യൂട്ട് ഓഫ് ഹോട്ടൽ മാനേജ്‌മെന്റ് ആൻഡ് കാറ്ററിംഗ് ടെക്‌നോളജി കോളേജിൽ ഓണാഘോഷത്തിനിടെ കടന്നൽ കൂടിളകി നൂറോളം വിദ്യാർത്ഥികൾക്കും ഒരു അധ്യാപകനും കുത്തേറ്റു. ഇന്ന് ഉച്ചയ്ക്ക് 3.15-ഓടെയാണ് സംഭവം.

കോളേജ് കെട്ടിടത്തിന്റെ മുകളിൽനിന്ന് ബാനർ കെട്ടിയിറക്കുന്നതിനിടെ കളർ സ്മോക്ക് പടക്കം പൊട്ടിച്ചതാണ് കടന്നലുകൾ ഇളകാൻ കാരണം. ബാനറിന്റെ ഇരുവശത്തും വെച്ച കളർ സ്മോക്ക് പടക്കത്തിൽനിന്നുള്ള പുകയേറ്റ് സമീപത്തുണ്ടായിരുന്ന കടന്നൽക്കൂട് ഇളകുകയായിരുന്നു.

കുത്തേറ്റ വിദ്യാർത്ഥികളെയും അധ്യാപകനെയും ഉടൻതന്നെ പ്രാഥമിക ചികിത്സ നൽകിയശേഷം പാലായിലെ വിവിധ ആശുപത്രികളിൽ പ്രവേശിപ്പിച്ചു. ആരുടെയും പരിക്ക് ഗുരുതരമല്ലെന്ന് ആശുപത്രി അധികൃതർ അറിയിച്ചു.