ആദ്യ ബഹിരാകാശ സഞ്ചാരി ഹനുമാൻജിയെന്ന് മുൻ കേന്ദ്രമന്ത്രിയും ബിജെപി നേതാവുമായ അനുരാഗ് താക്കൂർ. ദേശീയ ബഹിരാകാശ ദിനാഘോഷത്തോടനുബന്ധിച്ച് ഉനയിലെ ഒരു പിഎം ശ്രീ സ്കൂളിൽ വെച്ച് വിദ്യാർത്ഥികളോട് സംസാരിക്കുന്ന വേളയിലാണ് അനുരാ​ഗിന്റെ പരാമർശം. സ്കൂൾ പാഠപുസ്തകങ്ങൾക്കപ്പുറം ചിന്തിക്കാനും ഇന്ത്യയുടെ പുരാതന പാരമ്പര്യങ്ങളിൽ നിന്ന് പ്രചോദനം ഉൾക്കൊള്ളാനും അദ്ദേഹം വിദ്യാർത്ഥികളോട് അഭ്യർത്ഥിച്ചു.

ബഹിരാകാശത്ത് യാത്ര ചെയ്ത ആദ്യത്തെ വ്യക്തി ആരാണെന്ന് താക്കൂർ ചോദിച്ചപ്പോൾ വിദ്യാർത്ഥികൾ ഒന്നടങ്കം 'നീൽ ആംസ്ട്രോംഗ്' എന്ന് മറുപടി നൽകി. അപ്പോൾ ചിരിച്ചുകൊണ്ട്, 'എനിക്ക് തോന്നുന്നത് വായുപുത്രനായ ഹനുമാൻജിയാണ് ആദ്യ ബഹിരാകാശ സഞ്ചാരി' എന്ന് താക്കൂർ മറുപടി നൽകി.

ഇന്ത്യയുടെ നാഗരിക വിജ്ഞാനം പലപ്പോഴും അവഗണിക്കപ്പെടുന്നുവെന്ന് അദ്ദേഹം ചൂണ്ടിക്കാട്ടി. "ആയിരക്കണക്കിന് വർഷം പഴക്കമുള്ള നമ്മുടെ പാരമ്പര്യവും അറിവും സംസ്കാരവും നാം മനസ്സിലാക്കാത്ത പക്ഷം ബ്രിട്ടീഷുകാർ നമ്മളെ എങ്ങനെയാണോ കണ്ടത് അങ്ങനെ തന്നെയായിരിക്കും നമ്മളും" എന്നും അദ്ദേഹം കൂട്ടിച്ചേർത്തു. അധ്യാപകരോടും വിദ്യാർത്ഥികളോടും പാഠപുസ്തകങ്ങൾക്കപ്പുറം ചിന്തിക്കാനും നമ്മുടെ രാഷ്ട്രത്തെയും പാരമ്പര്യങ്ങളെയും അറിവിനെയും നോക്കിക്കാണാനും താക്കൂർ അഭ്യർത്ഥിച്ചു.

1961-ൽ ബഹിരാകാശത്തേക്ക് യാത്ര ചെയ്ത ആദ്യ മനുഷ്യനായി അറിയപ്പെടുന്നത് സോവിയറ്റ് ബഹിരാകാശ സഞ്ചാരിയായ യൂറി ഗഗാറിനാണ്. അതേസമയം, ഈ വർഷം ഗ്രൂപ്പ് ക്യാപ്റ്റൻ ശുഭൻഷു ശുക്ല രണ്ടാമത്തെ ഇന്ത്യൻ ബഹിരാകാശ സഞ്ചാരിയായി ബഹിരാകാശത്തേക്ക് യാത്ര ചെയ്തിരുന്നു. 1984-ൽ രാകേഷ് ശർമ്മയുടെ ചരിത്രപരമായ യാത്രയ്ക്ക് ശേഷമുള്ള ഇന്ത്യയുടെ വലിയൊരു നേട്ടമാണിത്.