ഇന്ത്യയിലെ അംബാസഡറായി ഡൊണാൾഡ് ട്രംപിന്റെ ‌പേഴ്‌സണൽ ചീഫ് ആയിരുന്ന സെർജിയോ ഗോറിനെ നിയമിച്ചു. 38 വയസ്സുകാരനായ ഗോർ, ട്രംപിനോടുള്ള വിശ്വസ്തത കണക്കിലെടുത്താണ് ഈ സുപ്രധാന പദവിയിലേക്ക് തിരഞ്ഞെടുക്കപ്പെട്ടത്.

ഈ നിയമനം വഴി, ഇന്ത്യയിലേക്കുള്ള യു.എസ് അംബാസഡറായും, ദക്ഷിണ-മധ്യേഷ്യൻ രാജ്യങ്ങളുടെ പ്രത്യേക പ്രതിനിധിയായും ഗോർ പ്രവർത്തിക്കും. നിയമനത്തിന് സ്ഥിരീകരണം ലഭിക്കുന്നത് വരെ അദ്ദേഹം പേഴ്‌സണൽ ചീഫ് സ്ഥാനത്ത് തുടരും. ജോർജ് വാഷിംഗ്ടൺ യൂണിവേഴ്സിറ്റിയിൽ നിന്ന് ബിരുദം നേടിയ ഗോർ, രാഷ്ട്രീയ രംഗത്ത് സജീവമായിരുന്നു.

2008-ൽ സെനറ്റർ ജോൺ മക്കെയ്‌നിന്റെ പ്രസിഡന്റ് തിരഞ്ഞെടുപ്പ് പ്രചാരണത്തിൽ പ്രവർത്തകനായിരുന്ന അദ്ദേഹം, റിപ്പബ്ലിക്കൻ നാഷണൽ കമ്മിറ്റിയിലും വിവിധ പ്രതിനിധികളുടെ വക്താവായും പ്രവർത്തിച്ചിട്ടുണ്ട്. 2013 മുതൽ കെന്റക്കി സെനറ്റർ റാൻഡ് പോളിന്റെ രാഷ്ട്രീയ പ്രവർത്തന സമിതിയായ RANDPAC-ൽ പ്രവർത്തിച്ച ഗോർ, പിന്നീട് പോളിന്റെ വക്താവും കമ്മ്യൂണിക്കേഷൻസ് ഡയറക്ടറായും സേവനമനുഷ്ഠിച്ചിട്ടുണ്ട്.