അമേരിക്കൻ പ്രസിഡന്റ് ഡൊണാൾഡ് ട്രംപിന്റെ പുതിയ താരിഫ് നിയമങ്ങൾ ഇരു രാജ്യങ്ങളും തമ്മിലുള്ള താളപ്പിഴകൾക്ക് കാരണമായിരുന്നു. ഇപ്പോഴിതാ ഇന്ത്യ യു.എസിലേക്കുള്ള തപാൽ സേവനങ്ങൾ താൽക്കാലികമായി നിർത്തിവെച്ചു. ഇന്ത്യൻ ഉത്പന്നങ്ങൾക്ക് അമേരിക്ക 50% അധിക തീരുവ ഏർപ്പെടുത്തിയതിന് പിന്നാലെയാണ് ഇന്ത്യയുടെ ഈ നീക്കം.

"2025 ജൂലൈ 30-ന് യു.എസ്. ഭരണകൂടം പുറത്തിറക്കിയ എക്സിക്യൂട്ടീവ് ഓർഡർ നമ്പർ 14324 ശ്രദ്ധയിൽപ്പെട്ടിട്ടുണ്ട്. ഇതിൻ്റെ അടിസ്ഥാനത്തിൽ 800 ഡോളർ വരെയുള്ള സാധനങ്ങളുടെ തീരുവ ഒഴിവാക്കിക്കൊണ്ടുള്ള നിയമം 2025 ഓഗസ്റ്റ് 29 മുതൽ പിൻവലിക്കും," കേന്ദ്ര വാർത്താവിനിമയ മന്ത്രാലയത്തിന്റെ ഔദ്യോഗിക പത്രക്കുറിപ്പിൽ പറയുന്നു.

പുതിയ ഉത്തരവ് പ്രകാരം, യു.എസ്. ലക്ഷ്യമിട്ടുള്ള എല്ലാ അന്താരാഷ്ട്ര തപാൽ ഇനങ്ങൾക്കും അവയുടെ മൂല്യം പരിഗണിക്കാതെ തന്നെ, രാജ്യങ്ങൾ തമ്മിലുള്ള അടിയന്തര സാമ്പത്തിക അധികാര നിയമം (IEEPA) അനുസരിച്ചുള്ള കസ്റ്റംസ് തീരുവ ബാധകമായിരിക്കും. എന്നിരുന്നാലും, 100 ഡോളർ വരെ മൂല്യമുള്ള സമ്മാനങ്ങൾക്ക് തീരുവയിൽ നിന്ന് ഇളവ് ലഭിക്കുമെന്നും റിപ്പോർട്ട്.

യു.എസ്. കസ്റ്റംസ് ആൻഡ് ബോർഡർ പ്രൊട്ടക്ഷൻ (CBP) അംഗീകരിച്ച ട്രാൻസ്പോർട്ട് കാരിയറുകൾ തപാൽ ഷിപ്പ്മെന്റുകൾക്ക് തീരുവ ഈടാക്കുകയും അത് സർക്കാരിലേക്ക് അടയ്ക്കുകയും ചെയ്യണം. എന്നാൽ ഈ പ്രക്രിയകൾ സംബന്ധിച്ച മാർഗ്ഗനിർദ്ദേശങ്ങൾ വ്യക്തമല്ലാത്തതിനാൽ യു.എസിലേക്ക് സാധനങ്ങൾ എത്തിക്കുന്ന വിമാനക്കമ്പനികൾ തപാൽ ഉത്പന്നങ്ങൾ സ്വീകരിക്കാൻ തയ്യാറല്ലെന്ന് അറിയിച്ചതായി മന്ത്രാലയം വ്യക്തമാക്കി.

ഈ സാഹചര്യത്തിൽ, ഓഗസ്റ്റ് 25 മുതൽ യു.എസിലേക്കുള്ള എല്ലാ തപാൽ സേവനങ്ങളും താൽക്കാലികമായി നിർത്തിവെയ്ക്കാൻ തപാൽ വകുപ്പ് തീരുമാനിച്ചു. 100 ഡോളർ വരെ മൂല്യമുള്ള ഇനങ്ങൾക്ക് മാത്രമാണ് ഇളവ്.

നിലവിലെ സാഹചര്യം സൂക്ഷ്മമായി നിരീക്ഷിച്ചുവരികയാണെന്നും, സേവനങ്ങൾ എത്രയും പെട്ടെന്ന് പുനരാരംഭിക്കാൻ ശ്രമങ്ങൾ നടത്തുമെന്നും തപാൽ വകുപ്പ് അറിയിച്ചു. നിർത്തിവച്ച സേവനങ്ങൾ കാരണം തപാൽ ഇനങ്ങൾ അയയ്ക്കാൻ സാധിക്കാത്ത ഉപഭോക്താക്കൾക്ക് തപാൽ നിരക്ക് തിരികെ നൽകുമെന്നും പ്രസ്താവനയിൽ പറയുന്നു.

റഷ്യൻ എണ്ണ വാങ്ങുന്നതിന് 25% അധിക പിഴ ഉൾപ്പെടെ, ഇന്ത്യൻ ഉത്പന്നങ്ങൾക്ക് ഡൊണാൾഡ് ട്രംപ് 50% തീരുവ ഏർപ്പെടുത്തിയതിന് പിന്നാലെയുണ്ടായ ഈ നീക്കം ഇരു രാജ്യങ്ങളും തമ്മിലുള്ള വ്യാപാര തർക്കങ്ങൾ രൂക്ഷമാക്കുന്നതിന് കാരണമായി. അമേരിക്കയുടെ ഈ തീരുമാനത്തെ ഇന്ത്യ "അന്യായവും നീതിരഹിതവും യുക്തിരഹിതവുമാണ്" എന്ന് വിശേഷിപ്പിക്കുകയും ദേശീയ താൽപ്പര്യങ്ങൾ സംരക്ഷിക്കാൻ ആവശ്യമായ എല്ലാ നടപടികളും സ്വീകരിക്കുമെന്ന് അറിയിക്കുകയും ചെയ്തിരുന്നു.