ലോകത്തെ ഏറ്റവും ദയാലുവായ ന്യായാധിപന്‍ എന്നറിയപ്പെട്ടിരുന്ന ഫ്രാങ്ക് കാപ്രിയോ അന്തരിച്ചു. 88 വയസ്സായിരുന്നു. യു.എസിലെ മുൻ റോഡ് ഐലൻഡ് പ്രൊവിഡൻസ് മുനിസിപ്പൽ കോടതി ചീഫ് ജഡ്ജി കൂടിയായിരുന്നു അദ്ദേഹം. ഏറെക്കാലം പാന്‍ക്രിയാറ്റിക് അർബുദത്തിന് ചികിത്സയിലായിരുന്ന ഫ്രാങ്ക് കാപ്രിയോ ബുധനാഴ്ച്ചയാണ് മരിച്ചത്. അദ്ദേഹത്തിൻ്റെ ഔദ്യോഗിക സോഷ്യൽ മീഡിയ അക്കൗണ്ടിലൂടെയാണ് ലോകം ഈ ദുഃഖവാർത്ത അറിഞ്ഞത്.

മരണത്തിന് ദിവസങ്ങൾക്ക് മുമ്പ്, തൻ്റെ രോഗാവസ്ഥയെക്കുറിച്ച് സൂചിപ്പിച്ച് കാപ്രിയോ ഒരു വീഡിയോ ഫേസ്ബുക്കിൽ പങ്കുവെച്ചിരുന്നു. തനിക്ക് തിരിച്ചടി നേരിട്ടെന്നും ആശുപത്രിയിൽ തിരികെ പ്രവേശിപ്പിച്ചെന്നും, എല്ലാവരുടെയും പ്രാർത്ഥനയിൽ തന്നെ ഓർക്കണമെന്നും അദ്ദേഹം ആ വീഡിയോയിൽ ആവശ്യപ്പെട്ടിരുന്നു.

ജീവിതവും കരിയറും

1936-ൽ ഒരു സാധാരണ ഇറ്റാലിയൻ-അമേരിക്കൻ കുടുംബത്തിലാണ് ഫ്രാങ്ക് കാപ്രിയോ ജനിച്ചത്. ജീവിതത്തിൻ്റെ ഭൂരിഭാഗവും അദ്ദേഹം ചെലവഴിച്ചത് പ്രൊവിഡൻസിലാണ്. 1985 മുതൽ 2023-ൽ വിരമിക്കുന്നത് വരെ ഏകദേശം 40 വർഷം അദ്ദേഹം പ്രൊവിഡൻസ് മുനിസിപ്പൽ കോടതിയുടെ ചീഫ് ജഡ്ജിയായി സേവനമനുഷ്ഠിച്ചു.

'കോട്ട് ഇന്‍ പ്രൊവിഡന്‍സ്' ഷോ

കോടതിയിൽ ചെറിയ കുറ്റകൃത്യങ്ങൾക്ക് ദയയോടെ വിധി കൽപ്പിക്കുന്ന അദ്ദേഹത്തിൻ്റെ രീതികൾക്ക് വലിയ സ്വീകാര്യത ലഭിച്ചിരുന്നു. ഇത് 'കോട്ട് ഇന്‍ പ്രൊവിഡന്‍സ്' എന്ന ടിവി ഷോയിലൂടെ ലോകമെമ്പാടുമുള്ള പ്രേക്ഷകരിലേക്ക് എത്തി. കോടതിമുറിയിൽ ചിത്രീകരിച്ചിരുന്ന ഈ ഷോ, അദ്ദേഹത്തിൻ്റെ നർമ്മവും അനുകമ്പയും കൊണ്ട് വൈറലായി. ഷോയിലെ ചെറിയ ക്ലിപ്പുകൾ പോലും സോഷ്യൽ മീഡിയയിൽ ഒരു ബില്യണിലധികം കാഴ്ചക്കാരെ നേടി. 2018 മുതൽ 2020 വരെയായിരുന്നു ഈ ഷോ സംപ്രേഷണം ചെയ്തിരുന്നത്.

കാപ്രിയോയുടെ വിധിന്യായങ്ങൾ മനുഷ്യത്വത്തിൻ്റെയും കരുണയുടെയും ഉദാഹരണങ്ങളായിരുന്നു. ചെറിയ കുറ്റകൃത്യങ്ങളിൽ ഏർപ്പെട്ടവരെ അദ്ദേഹം വാത്സല്യത്തോടെയാണ് സമീപിച്ചത്. "നമ്മൾ വളരെ കലഹപ്രിയമായ ഒരു സമൂഹത്തിലാണ് ജീവിക്കുന്നത്," 2017-ൽ അദ്ദേഹം പറഞ്ഞു, "ദയയും നീതിയും കരുണയും ഉപയോഗിച്ച് സർക്കാർ സ്ഥാപനങ്ങൾക്ക് കൂടുതൽ നന്നായി പ്രവർത്തിക്കാൻ കഴിയുമെന്ന് ആളുകൾ മനസ്സിലാക്കുമെന്ന് ഞാൻ പ്രതീക്ഷിക്കുന്നു."തൻ്റെ ജീവിതത്തിലൂടെയും പ്രവൃത്തികളിലൂടെയും നീതിക്ക് മാനുഷികമായ മുഖം നൽകിയ കാപ്രിയോ, അദ്ദേഹത്തെ സ്നേഹിച്ച ലക്ഷക്കണക്കിന് ആളുകളുടെ മനസ്സിൽ എന്നെന്നും ജീവിക്കും.