വാഷിംഗ്ടൺ: ഡി.സി.യിലെ ഭവനരഹിതർക്കുള്ള ടെന്റുകളും ക്യാമ്പുകളും പൂർണമായി നീക്കം ചെയ്യാൻ ഒരുങ്ങി ട്രംപ് ഭരണകൂടം. ഇതിനായി കർശന നടപടികൾ ആരംഭിച്ചു കഴിഞ്ഞു. "സൗന്ദര്യവത്കരണം" ലക്ഷ്യമിട്ടുള്ള ഈ നീക്കത്തിന് യു.എസ്. ഡിപ്പാർട്ട്മെന്റ് ഓഫ് ദി ഇൻ്റീരിയർ പിന്തുണ പ്രഖ്യാപിച്ചിട്ടുണ്ട്.
സുരക്ഷാ ഭീഷണിയോ, ആരോഗ്യപരമായ സാഹചര്യങ്ങളിലോ അല്ലെങ്കിൽ പൊതുജനങ്ങൾക്ക് ബുദ്ധിമുട്ടോ ഉണ്ടാക്കുമ്പോൾ മാത്രമാണ് നേരത്തെ ഇത്തരം ക്യാമ്പുകൾ ഒഴിപ്പിക്കാറുണ്ടായിരുന്നത്. എന്നാൽ, ഇപ്പോൾ ഈ നയം പൂർണമായും മാറ്റിയിരിക്കുകയാണ്.
പുതിയ നയം പ്രകാരം, ഭവനരഹിതർക്ക് രണ്ട് വഴികൾ മാത്രമാണ് മുന്നിലുള്ളത്. ഒന്നുകിൽ ഭവനരഹിതർക്കായുള്ള അഭയകേന്ദ്രങ്ങളിലേക്ക് മാറുക. അല്ലെങ്കിൽ ഈ നിർദേശം നിരസിച്ചാൽ ജയിലിൽ പോകേണ്ടിവരും. വൈറ്റ് ഹൗസ് പ്രസ് സെക്രട്ടറി കരോലിൻ ലീവിറ്റ് ആണ് ഇക്കാര്യം അറിയിച്ചത്.
അതേസമയം യു.എസ്. പാർക്ക് പൊലീസ് ഇതിനോടകം 70-ഓളം ക്യാമ്പുകൾ ഒഴിപ്പിച്ചു കഴിഞ്ഞു. ശേഷിക്കുന്ന രണ്ട് ക്യാമ്പുകൾ കൂടി ഈ ആഴ്ച തന്നെ ഒഴിപ്പിക്കുമെന്നും ലീവിറ്റ് പറഞ്ഞു. എഫ്.ബി.ഐ., സീക്രട്ട് സർവീസ്, ഡി.സി. പോലീസ് എന്നിവരുൾപ്പെട്ട ഒരു മൾട്ടി-ഏജൻസി ടീം ആണ് ഈ ദൗത്യം നിർവഹിക്കുന്നത്.
കൂടാതെ, കുറ്റകൃത്യങ്ങൾ തടയുന്നതിനായി ചില നയപരമായ മാറ്റങ്ങളും ഇൻ്റീരിയർ സെക്രട്ടറി ഡഗ് ബർഗം പ്രഖ്യാപിച്ചു. യു.എസ്. പാർക്ക് പൊലീസ് പബ്ലിക് ഇൻഫർമേഷൻ ഓഫീസർമാർക്ക് (PIO) ഇനിമുതൽ ഒളിവിൽ പോകുന്ന കുറ്റവാളികളെ പ്രത്യേക സാഹചര്യങ്ങളിൽ പിന്തുടരാൻ സാധിക്കും. ഈ മാറ്റങ്ങൾ വരുത്താനുള്ള കാരണം അദ്ദേഹം വ്യക്തമാക്കിയില്ല.