മഹാരാഷ്ട്ര ഗവർണർ സി.പി. രാധാകൃഷ്ണനെ ഉപരാഷ്ട്രപതി സ്ഥാനാർത്ഥിയായി എൻ.ഡി.എ. പ്രഖ്യാപിച്ചു. പ്രധാനമന്ത്രി നരേന്ദ്ര മോദി, കേന്ദ്ര ആഭ്യന്തര മന്ത്രി അമിത് ഷാ എന്നിവരുൾപ്പെടെയുള്ള മുതിർന്ന നേതാക്കൾ പങ്കെടുത്ത പാർലമെൻ്ററി ബോർഡ് യോഗത്തിന് ശേഷമാണ് ഈ പ്രഖ്യാപനം വന്നത്. ആരോഗ്യപരമായ കാരണങ്ങളാൽ ഉപരാഷ്ട്രപതി ജഗ്ദീപ് ധൻകർ ജൂലൈ 21-ന് രാജിവെച്ചതിനെ തുടർന്നാണ് പുതിയ സ്ഥാനാർത്ഥിയെ തിരഞ്ഞെടുത്തത്.

സി.പി. രാധാകൃഷ്ണന്റെ രാഷ്ട്രീയ ജീവിതം

നാല് പതിറ്റാണ്ടിലേറെയായി തമിഴ്നാട്ടിലെ രാഷ്ട്രീയത്തിൽ സജീവമായ വ്യക്തിയാണ് സി.പി. രാധാകൃഷ്ണൻ. 1957 ഒക്ടോബർ 20-ന് തമിഴ്നാട്ടിലെ തിരുപ്പൂരിൽ ജനിച്ച അദ്ദേഹം രാഷ്ട്രീയ സ്വയംസേവക സംഘം (ആർ.എസ്.എസ്.) വോളണ്ടിയറായിട്ടാണ് പൊതുജീവിതം ആരംഭിച്ചത്.

പാർലമെൻ്ററി ജീവിതം: 1998-ലും 1999-ലും കോയമ്പത്തൂരിൽ നിന്ന് രണ്ട് തവണ ലോക്സഭാ എം.പി.യായി അദ്ദേഹം തിരഞ്ഞെടുക്കപ്പെട്ടു. ഈ കാലയളവിൽ ടെക്സ്റ്റൈൽസ് പാർലമെൻ്ററി സ്റ്റാൻഡിംഗ് കമ്മിറ്റിയുടെ ചെയർമാനായി പ്രവർത്തിച്ചു.

സംസ്ഥാന അധ്യക്ഷൻ: 2004 മുതൽ 2007 വരെ തമിഴ്നാട് ബി.ജെ.പി. സംസ്ഥാന അധ്യക്ഷനായി പ്രവർത്തിച്ചു. ഈ കാലയളവിൽ നദികളെ ബന്ധിപ്പിക്കുക, തൊട്ടുകൂടായ്മ ഇല്ലാതാക്കുക, ഏകീകൃത സിവിൽ കോഡ് നടപ്പാക്കുക തുടങ്ങിയ വിഷയങ്ങളിൽ ശ്രദ്ധ കേന്ദ്രീകരിച്ച് 93 ദിവസം നീണ്ട രഥയാത്രയ്ക്ക് അദ്ദേഹം നേതൃത്വം നൽകി.

ഗവർണർ പദവി: 2024 ജൂലൈ 31-നാണ് അദ്ദേഹം മഹാരാഷ്ട്ര ഗവർണറായി സത്യപ്രതിജ്ഞ ചെയ്തത്. അതിനു മുൻപ് ഒന്നര വർഷത്തോളം ജാർഖണ്ഡ് ഗവർണറായിരുന്നു. ഈ സമയത്ത് തെലങ്കാന, പുതുച്ചേരി എന്നിവിടങ്ങളിലെ അധിക ചുമതലകളും വഹിച്ചു.

കേരളത്തിലെ ചുമതല: 2020 മുതൽ 2022 വരെ ബി.ജെ.പി. കേരള ഘടകത്തിൻ്റെ പ്രഭാരി (ചുമതല) എന്ന നിലയിൽ പ്രവർത്തിച്ചിട്ടുണ്ട്.

തമിഴ്നാട്ടിൽനിന്നുള്ള മൂന്നാമത്തെ ഉപരാഷ്ട്രതി എന്ന പ്രത്യേകതയും രാധാകൃഷ്ണനുണ്ട്. ആദ്യ ഉപരാഷ്ട്രപതി ഡോ.എസ്.രാധാകൃഷ്ണനും ആർ.വെങ്കട്ടരാമനും തമിഴ്നാട്ടിൽനിന്നായിരുന്നു.

മുൻ പ്രധാനമന്ത്രി എ ബി വാജ്പേയിയുമായി അടുത്ത ബന്ധം പുലർത്തിയിരുന്ന രാധാകൃഷ്ണൻ പ്രധാനമന്ത്രി നരേന്ദ്രമോദിയുടെയും വിശ്വസ്തനായ നേതാവ് കൂടിയാണ്. കൂടാതെ, കയർ ബോർഡ് ചെയർമാൻ എന്ന നിലയിൽ 2,532 കോടി രൂപയുടെ കയറ്റുമതി റെക്കോർഡ് നേടി പൊതുഭരണത്തിലും അദ്ദേഹം തൻ്റെ കഴിവ് തെളിയിച്ചു. അദ്ദേഹത്തിന്റെ ഈ അനുഭവപരിചയം പുതിയ പദവിക്ക് മുതൽക്കൂട്ടാകുമെന്നാണ് വിലയിരുത്തൽ.