വരാനിരിക്കുന്ന ഉപരാഷ്ട്രപതി തിരഞ്ഞെടുപ്പിനുള്ള സ്ഥാനാർത്ഥിയായി മഹാരാഷ്ട്ര ഗവർണർ സി പി രാധാകൃഷ്ണനെ (C P Radhakrishnan) നാഷണൽ ഡെമോക്രാറ്റിക് അലയൻസ് (എൻ‌ഡി‌എ) പ്രഖ്യാപിച്ചു. രാധാകൃഷ്ണൻ ഒരു രാഷ്ട്രതന്ത്രജ്ഞനാണെന്നും തമിഴ്‌നാട്ടിലെ എല്ലാ സമൂഹത്തിലും ആദരവ് നേടിയ വ്യക്തിയാണെന്നും ബിജെപി അധ്യക്ഷൻ ജെ പി നദ്ദ പ്രതികരിച്ചു.

ആരോഗ്യപരമായ കാരണങ്ങൾ ചൂണ്ടിക്കാട്ടി 2025 ജൂലൈ 21 ന് വൈസ് പ്രസിഡന്റ് സ്ഥാനത്ത് നിന്ന് ജഗ്ദീപ് ധൻഖർ (74) രാജിവച്ചിരുന്നു. അദ്ദേഹം രാജിവച്ച് ആഴ്ചകൾക്ക് ശേഷമാണ് ഇക്കാര്യം അറിയിച്ചത്. പാർട്ടി ആസ്ഥാനത്ത് ചേർന്ന ബിജെപി പാർലമെന്ററി ബോർഡ് യോഗത്തിലാണ് രാധാകൃഷ്ണന്റെ പേര് അന്തിമമാക്കിയത്.

ഇന്ത്യയുടെ ഉപരാഷ്ട്രപതിയുടെ തിരഞ്ഞെടുപ്പിനുള്ള ഷെഡ്യൂൾ തിരഞ്ഞെടുപ്പ് കമ്മീഷൻ ഇതിനോടകം പ്രഖ്യാപിച്ചിരുന്നു. സെപ്റ്റംബർ 9 ന് രാവിലെ 10 മുതൽ വൈകുന്നേരം 5 വരെ പാർലമെന്റ് ഹൗസിന്റെ ഒന്നാം നിലയിൽ വോട്ടെടുപ്പ് നടക്കുമെന്ന് റിപ്പോർട്ട്. സി പി രാധാകൃഷ്ണൻ നിലവിൽ മഹാരാഷ്ട്രയുടെ 24-ാമത് ഗവർണറായി സേവനമനുഷ്ഠിക്കുന്നു.

മുമ്പ് 2023 ഫെബ്രുവരി മുതൽ 2024 ജൂലൈ വരെ അദ്ദേഹം ജാർഖണ്ഡ് ഗവർണറായി സേവനമനുഷ്ഠിച്ചിട്ടുണ്ട്. 2024 മാർച്ച് മുതൽ ജൂലൈ വരെ തെലങ്കാന ഗവർണറായും പുതുച്ചേരി ലെഫ്റ്റനന്റ് ഗവർണറായും അദ്ദേഹം അധിക ചുമതല വഹിച്ചു. മുതിർന്ന ബിജെപി നേതാവായ രാധാകൃഷ്ണൻ, കോയമ്പത്തൂരിൽ നിന്ന് രണ്ടുതവണ ലോക്സഭയിലേക്ക് തിരഞ്ഞെടുക്കപ്പെട്ടു. മുമ്പ് തമിഴ്നാട് ബിജെപി സംസ്ഥാന പ്രസിഡന്റായും സേവനമനുഷ്ഠിച്ചിട്ടുണ്ട്.