നാലാളിന്റെ പൊക്കത്തിൽ ഒരു സൂര്യകാന്തി. യുഎസിലെ അലക്സ് ബാബിച്ചിന്റെ തോട്ടത്തിലുള്ള ഭീമൻ സൂര്യകാന്തിച്ചെടിയാണ് ലോകത്തെ ഏറ്റവും പൊക്കമുള്ള സൂര്യകാന്തിച്ചെടിക്കുള്ള റെക്കോർഡ് നേടാൻ ലക്ഷ്യമിട്ടിരിക്കുന്നത്. യുക്രെയ്നിയൻ വംശജനായ ബാബിച്ച് നീണ്ടകാലമായി ഉയരമുള്ള സൂര്യകാന്തികൾ വളർത്തുന്നതിൽ തൽപരനാണ്. 26 അടിയും 8 ഇഞ്ചും പൊക്കമാണ് ഈ സൂര്യകാന്തിക്ക് ഉള്ളത്. ഔദ്യോഗികമായ അളവെടുത്തതിനു ശേഷം അമേരിക്കയിലെ ഏറ്റവും ഉയരമുള്ള സൂര്യകാന്തിക്കുള്ള റെക്കോർഡ് ഈ ചെടി സ്വന്തമാക്കും.

ചെടികൾ ചുമ്മാതെ വളർത്തുക മാത്രമല്ല. അതിന ഓമനപ്പേരുകളും അദ്ദേഹം ഇടാറുണ്ട്. ക്ലോവർ എന്നാണു പുതിയ സൂര്യകാന്തിയുടെ പേര്. സൂര്യകാന്തിയുടെ ഇലയിൽ ബാബിച്ചിന്റെ മകൻ ഒരു ക്ലോവർ ഇല വച്ചിരുന്നു. അച്ഛന്റെ ഉദ്യമത്തിനു ശുഭാംശ നേർന്നായിരുന്നു ഇത്. അങ്ങനെയാണു ഈ സൂര്യകാന്തിക്ക് പേരിട്ടതെന്ന് ബാബിച്ച് പറഞ്ഞു. എല്ലാ ദിവസവും ബാബിച്ച് തന്റെ പൂക്കളെ നിരീക്ഷിക്കും. അതിനിടയിൽ അണ്ണാറക്കണ്ണന്മാർ തന്റെ പൂക്കളെ ശല്യപ്പെടുത്താറുണ്ടെന്നും ബാബിച്ച് പറയുന്നു.

റഷ്യ–യുക്രെയ്ൻ യുദ്ധം അതിന്റെ ഉച്ചസ്ഥായിയിൽ നിൽക്കുന്ന സമയത്താണ് ഇതു വളർത്തിയത്. യുക്രെയ്ൻകാർക്ക് സൂര്യകാന്തി വളരെ പ്രധാനപ്പെട്ട ഒരു പുഷ്പവും ചിഹ്നവുമാണെന്നു ബാബിച്ച് പറയുന്നു. യുക്രെയ്ന്റെ ദേശീയ പുഷ്പവും സൂര്യകാന്തിയാണ്. എന്നാൽ ലോകത്തിലെ ഏറ്റവും പൊക്കമുള്ള സൂര്യകാന്തിപുഷ്പം പക്ഷേ ഇതൊന്നുമല്ല, അതു ജർമനിയിൽ ഹാൻസ്–പീറ്റർ ഷിഫർ എന്നയാൾ വളർത്തിയ സൂര്യകാന്തിയാണ്. 30 അടിയും ഒരിഞ്ചുമാണ് ഇതിന്റെ പൊക്കം.