നമ്മുടെ ശരീരം ആരോഗ്യകരമായിരിക്കുവാൻ പതിവായി വ്യായാമം ചെയ്യേണ്ടത് പ്രധാനമാണ്. എന്നാൽ ഇന്നത്തെ തിരക്കുപിടിച്ച ജീവിതത്തിൽ ആരും അത് പതിവാക്കാറില്ലെന്നു മാത്രം. നമ്മുടെ ശരീരത്തിലെ ഏറ്റവും പ്രധാനപ്പെട്ട അവയവങ്ങളിൽ ഒന്നാണ് ഹൃദയം. ഹൃദയത്തെ ആരോഗ്യത്തോടെ നിലനിർത്തേണ്ടത് വളരെ പ്രധാനമാണ്. അതിന് ഏറ്റവും പ്രധാനം കൃത്യമായ വ്യായാമമാണ്.
എന്നാൽ ഇന്നത്തെ കാലത്ത് നാം കൂടുതലായി കാണുന്ന വാർത്തയാണ് ആളുകൾ വ്യായാമ വേളയിൽ ഹൃദയാഘാതത്തെതുടർന്ന് മരിച്ചുവെന്നത്. അതിനാൽ വ്യായാമം ചെയ്യുമ്പോൾ ശരീരം കാണിക്കുന്ന ഈ ലക്ഷണങ്ങൾങ്ങൾ ഒരിക്കലും അവഗണിക്കരുത്. നെഞ്ചുവേദന, ശ്വാസതടസ്സം, തലകറക്കം, ഹൃദയമിടിപ്പ്, വ്യായാമ വേളയിൽ ഉണ്ടാകുന്ന കടുത്ത ക്ഷീണം തുടങ്ങിയവയാണ് ഈ ലക്ഷണങ്ങൾ.
ഹൃദയാഘാതം, കൊറോണറി ആർട്ടറി രോഗം, അല്ലെങ്കിൽ ഹൃദയസ്തംഭനം തുടങ്ങിയ പ്രധാനപ്പെട്ട ഹൃദയ അവസ്ഥകളുടെ ആദ്യകാല സൂചകങ്ങളാകാം ഇവ. വ്യായാമ വേളയിൽ നിങ്ങളുടെ ശരീരം ശ്രദ്ധിക്കുകയും ഇത്തരം ലക്ഷണങ്ങൾ തിരിച്ചറിഞ്ഞ് ഉടനെ വൈദ്യസഹായം തേടുകയും ചെയ്യുന്നത് ഗുരുതമായ ആപത്തുകളെ തടയാൻ സഹായിക്കും. പതിവായി ഹൃദയ പരിശോധനയും അവബോധവും അത്യാവശ്യമാണ്, പ്രത്യേകിച്ച് 30 വയസ്സിനു മുകളിലുള്ളവർക്കോ ഉയർന്ന രക്തസമ്മർദ്ദം അല്ലെങ്കിൽ മറ്റ് ജീവിതശൈലി രോഗങ്ങൾ ഉള്ളവർക്കോ.
വ്യായാമ വേളയിൽ അനുഭവപ്പെടുന്ന ചെറിയ നെഞ്ചുവേദന അല്ലെങ്കിൽ ക്രമരഹിതമായ ഹൃദയമിടിപ്പ് എന്നിവയെ അവഗണിക്കരുത്. സാധാരണായി ആളുകൾ ഇത്തരം ലക്ഷണങ്ങളെ അവഗണിക്കുന്നതായി പബ്മെഡിൽ പ്രസിദ്ധീകരിച്ച ഒരു പഠനം കാണിക്കുന്നു. ഈ അവഗണന ഹൃദയാഘാതം അല്ലെങ്കിൽ അരിഹ്‌മിയ പോലുള്ള ഗുരുതരമായ ഹൃദയസംബന്ധമായ സംഭവങ്ങളുടെ സാധ്യത ഗണ്യമായി വർദ്ധിപ്പിക്കുന്നു. വ്യായാമത്തിനിടെ ഈ മുന്നറിയിപ്പ് ലക്ഷണങ്ങൾ തിരിച്ചറിയുകയും അവയോട് പ്രതികരിക്കുകയും ചെയ്യുന്നത് നിർണായകമാണ്.
ലക്ഷണങ്ങൾ
- നെഞ്ചുവേദന അല്ലെങ്കിൽ അസ്വസ്ഥത
പലപ്പോഴും ആളുകൾ അത് പേശികളുടെ സങ്കോചം കൊണ്ട് ഉണ്ടാകുന്നതാകാം എന്നു കരുതി അവഗണിക്കാറുണ്ട്.
- അമിതമായ ശ്വാസം മുട്ടൽ
കഠിനമായ വ്യായാമ വേളയിൽ ശ്വാസംമുട്ടൽ അനുഭവപ്പെടാം. എന്നാൽ ലഘുവായ വ്യായാമത്തിനിടയിലോ വിശ്രമിക്കുമ്പോഴോ ശ്വസിക്കുമ്പോൾ ബുദ്ധിമുട്ട് അനുഭവപ്പെടുന്നത്. ഹൃദയം കാര്യക്ഷമമായി പമ്പ് ചെയ്യുന്നില്ല എന്നതിന്റെ സൂചനയാണ്. ഇത് ഹൃദയസ്തംഭനം, ശ്വാസകോശത്തിൽ ദ്രാവകം അടിഞ്ഞുകൂടൽ, ഓക്സിജൻ വിതരണം കുറയൽ എന്നിവ കൊണ്ടാകാം.
- തലകറക്കം അല്ലെങ്കിൽ ബോധക്ഷയം
ഈ ലക്ഷണങ്ങൾ രക്തസമ്മർദ്ദം കുറയുന്നതിന്റെയോ തലച്ചോറിലേക്കുള്ള രക്തപ്രവാഹം അപര്യാപ്തമാകുന്നതിലേക്ക് നയിച്ചേക്കാം.
- ക്രമരഹിതമായ ഹൃദയമിടിപ്പ്
അസാധാരണമാംവിധം വേഗത്തിലുള്ളതോ അല്ലെങ്കിൽ അനിയന്ത്രിതമായ ഹൃദയമിടിപ്പ് അനുഭവപ്പെടുന്നുണ്ടെങ്കിൽ ഉടൻ തന്നെ ഡോക്ടറെ സമീപിക്കേണ്ടതാണ്.
- അമിതമായ ക്ഷീണം അല്ലെങ്കിൽ ബലഹീനത
നേരിയ വ്യായാമത്തിനിടയിലോ അതിനു തൊട്ടുപിന്നാലെയോ അമിതമായി ക്ഷീണം അനുഭവപ്പെടുന്നത്, പ്രത്യേകിച്ച് അത് നിങ്ങളുടെ ഫിറ്റ്നസ് നിലയുമായി പൊരുത്തപ്പെടാത്തപ്പോൾ, ശരീരത്തിലേക്ക് ശരിയായ രക്തയോട്ടം നൽകാൻ ഹൃദയത്തിന് കഴിവില്ലായ്മയെ സൂചിപ്പിക്കാം.
30 വയസ്സിൽ കൂടുതൽ ഉള്ളവർക്കാണ് ഹൃദയാഘാതത്തിനുള്ള സാധ്യത വർദ്ധിക്കുന്നത്. കാരണം അവർ പലപ്പോഴും കഛിനമായ വ്യായാമങ്ങളിൽ ഏർപ്പെടുന്നു. കൂടാതെ ഉയർന്ന രക്തസമ്മർദ്ദം, പ്രമേഹം അല്ലെങ്കിൽ ഉയർന്ന കൊളസ്ട്രോൾ ഉള്ള ആളുകൾ, പുകവലിക്കാർ അല്ലെങ്കിൽ പുകവലി ചരിത്രമുള്ളവർ, കുടുംബത്തിൽ ഹൃദ്രോഗമുള്ള ആളുകൾ ഉള്ളവർ എന്നിവരിലും ഹൃദയാഘാത സാധ്യത കൂടുതലാണ്.
(Disclaimer: ഈ ലേഖനം പൊതുവായ വിവരങ്ങളുടേയും ലേഖനങ്ങളുടേയും അടിസ്ഥാനത്തിൽ മാത്രമുള്ളതാണ്. നിങ്ങളുടെ ആരോഗ്യ ദിനചര്യയിലോ ചികിത്സയിലോ എന്തെങ്കിലും മാറ്റങ്ങൾ വരുത്തുന്നതിന് മുമ്പ് എല്ലായ്പ്പോഴും വിദഗ്ദ്ധനെ സമീപിക്കുക.)