ഇന്ത്യ 79-ാമത് സ്വാതന്ത്ര്യദിനം ആഘോഷിക്കാൻ ഒരുങ്ങുന്ന വേളയിൽ രാജ്യത്തെ അഭിസംബോധന ചെയ്ത് രാഷ്ട്രപതി ദ്രൗപതി മുർമു. ഭീകരതയ്‌ക്കെതിരായ മനുഷ്യരാശിയുടെ പോരാട്ടമായി ഓപ്പറേഷൻ സിന്ദൂർ ചരിത്രത്തിൽ ഇടംപിടിക്കുമെന്ന് രാഷ്ട്രപതി പറഞ്ഞു.
ഇന്ത്യ ഒരു സ്വാശ്രയ രാഷ്ട്രമായി മാറുന്നതിനുള്ള പാതയിലാണെന്നും, 2047 ഓടെ വികസിത സമ്പദ്‌വ്യവസ്ഥയാകാനുള്ള വലിയ ആത്മവിശ്വാസത്തോടെയാണ് രാഷ്ട്രം മുന്നേറുന്നത്. പണപ്പെരുപ്പം നിയന്ത്രണത്തിലാണെന്നും കയറ്റുമതി വർദ്ധിച്ചുവെന്നും മുർമു കൂട്ടിച്ചേർത്തു.
നമ്മുടെ പെൺമക്കളാണ് നമ്മുടെ അഭിമാനം. പ്രതിരോധം, സുരക്ഷ തുടങ്ങിയ മേഖലകളിലുൾപ്പെടെ എല്ലാ മേഖലകളിലും അവർ തടസ്സങ്ങൾ ഭേദിക്കുന്നു. മികവിന്റെയും ശാക്തീകരണത്തിന്റെയും സാധ്യതയുടെയും പ്രധാന സൂചകങ്ങളിൽ ഒന്നാണ് കായിക വിനോദങ്ങൾ. ഇന്ത്യയിൽ നിന്നുള്ള പത്തൊൻപത് വയസ്സുള്ള ഒരു പെൺകുട്ടിയും മുപ്പത്തിയെട്ട് വയസ്സുള്ള ഒരു സ്ത്രീയും ഫിഡെ വനിതാ ലോകകപ്പ് ചെസ് ചാമ്പ്യൻഷിപ്പിൽ ഫൈനലിസ്റ്റുകളായിരുന്നു.
തലമുറകളായി നമ്മുടെ സ്ത്രീകൾക്കിടയിൽ നിലനിൽക്കുന്നതും ആഗോളതലത്തിൽ താരതമ്യപ്പെടുത്താവുന്നതുമായ മികവിനെ ഇത് അടിവരയിടുന്നുവെന്നും രാഷ്ട്രപതി പറഞ്ഞു. തൊഴിലിലെ ലിംഗ വ്യത്യാസം കുറഞ്ഞുവരികയാണ്. 'നാരി ശക്തി വന്ദൻ അധിനിയം' എന്നതിലൂടെ, സ്ത്രീ ശാക്തീകരണം ഇനി ഒരു മുദ്രാവാക്യമല്ല, മറിച്ച് ഒരു യാഥാർത്ഥ്യമാണെന്നും രാഷ്ട്രപതി വ്യക്തമാക്കി.