ഇന്ത്യൻ ഉൽപ്പന്നങ്ങൾക്കുമേൽ 50 ശതമാനം തീരുവ ഈടാക്കിയ അമേരിക്കൻ തീരുമാനത്തിന് തിരിച്ചടി നൽകാൻ ഒരുങ്ങി ഇന്ത്യ. തെരഞ്ഞെടുത്ത അമേരിക്കൻ ഉത്പന്നങ്ങൾക്കുമേൽ കനത്ത തിരുവ ചുമത്താൻ കേന്ദ്രസർക്കാർ നടപടി സ്വീകരിക്കുന്നതായി ദേശീയ മാധ്യമങ്ങൾ റിപ്പോർട്ട് ചെയ്തു.

കഴിഞ്ഞ ഫെബ്രുവരിയിൽ പ്രധാനമന്ത്രി നരേന്ദ്രമോദിയുമായി നടത്തിയ ചർച്ചയിലെ തീരുമാനങ്ങളിൽ നിന്നും ട്രംപ് പിന്മാറിയതും ഇന്ത്യക്ക് പ്രകോപനമായി. ചർച്ചയിൽ ഉഭയകക്ഷി വ്യാപാരം 500 ബില്യൺ ഡോളറായി വർധിപ്പിക്കുമെന്നും സമഗ്രമായ ചർച്ചകൾ ആരംഭിക്കുമെന്നും പറഞ്ഞിരുന്നു.

എന്നാൽ ചില മേഖലകളിൽ ഇന്ത്യ വിപണി തുറന്നു കൊടുക്കണമെന്ന അമേരിക്കയുടെ ആവശ്യത്തെ തുടർന്ന് ചർച്ചകൾ സ്തംഭിച്ചു. കൂടാതെ റഷ്യയുമായുള്ള ഇന്ത്യയുടെ ബന്ധത്തെയും അമേരിക്ക രൂക്ഷമായി വിമർശിച്ചിരുന്നു. റഷ്യയിൽ നിന്ന് ഇന്ത്യ എണ്ണ വാങ്ങുന്നതിന് പിഴയെന്നോണം 25% അധികം നികുതി ചുമർത്താനും യുഎസ് തീരുമാനമെടുത്തു.

ഫെബ്രുവരി മുതൽ അലുമിനിയം, സ്റ്റീൽ എന്നിവയ്ക്ക് 25 ശതമാനം തീരുവ ഏർപ്പെടുത്തിയിരുന്നു. പിന്നാലെ തീരുവ 50 ശതമാനമാക്കി. അമേരിക്കയുടെ ഈ നീക്കം 7.6 ബില്യൺ ഡോളർ മൂല്യമുള്ള ഇന്ത്യൻ കയറ്റുമതിയെ ബാധിച്ചതായി റിപ്പോർട്ട്.

ഇരു രാജ്യങ്ങളും തമ്മിൽ ഉഭയകക്ഷി വ്യാപാര കരാറിനെക്കുറിച്ച് ചർച്ചകൾ നടത്തുമ്പോഴും, ഇന്ത്യയുടെ സാമ്പത്തിക താൽപ്പര്യങ്ങൾക്കെതിരെ അമേരിക്ക അന്യായമായി പ്രവർത്തിക്കുകയാണെന്നാണ് ഇന്ത്യയുടെ നിലപാട്. അമേരിക്കയുടെ ഏകപക്ഷീയവും യുക്തിരഹിതവുമായ നടപടികൾക്ക് മറുപടി നൽകാനുള്ള അവകാശം ഇന്ത്യക്കുണ്ടെന്നും കേന്ദ്രം വീക്ഷിക്കുന്നു.

യുഎസ് ഇന്ത്യയിലേക്ക് 45 ബില്യൺ ഡോളറിലധികം വിലവരുന്ന സാധനങ്ങളാണ് കയറ്റുമതി ചെയ്യുന്നത്. താരിഫ് വർധനക്ക് മുമ്പ് അമേരിക്കയിലേക്കുള്ള ഇന്ത്യൻ കയറ്റുമതി 86 ബില്യൺ ഡോളറായിരുന്നു. 2024-25 ൽ യുഎസ് ഇന്ത്യയിലേക്ക് 13.62 ബില്യൺ ഡോളറിന്റെ ഇലക്ട്രോണിക്സ്, കെമിക്കൽസ് എന്നിവ ഇറക്കുമതി ചെയ്തു. 2024-ൽ ഇന്ത്യയിലേക്കുള്ള യുഎസ് സേവന കയറ്റുമതി ഏകദേശം 16 ശതമാനം ഉയർന്ന് 41.8 ബില്യൺ ഡോളറായി.