വാഷിംഗ്ടൺ: നിലവിൽ യു.എസ്. വിസ കൈവശമുള്ള 5.5 കോടിയിലധികം വരുന്ന വിദേശികളുടെ രേഖകൾ പുനഃപരിശോധിക്കാനൊരുങ്ങി ട്രംപ് ഭരണകൂടം. നിയമം ലംഘിച്ച വിസ റദ്ദാക്കുന്നതിനോ അല്ലെങ്കിൽ കുടിയേറ്റ നിയമങ്ങളുടെ ലംഘനം കണ്ടെത്തുന്ന പക്ഷം നാടുകടത്തുന്നതിനോ വേണ്ടിയാണ് യുഎസ് സ്റ്റേറ്റ് ഡിപ്പാർട്ട്മെന്റിന്റെ ഈ നടപടി.

എല്ലാ യു.എസ്. വിസ ഉടമകളും പരിശോധനയ്ക്ക് വിധേയരാകുമെന്നും, വിസ ലഭിക്കുന്നതിനുള്ള അയോഗ്യതകൾ കണ്ടെത്തുക എന്നതാണ് ഇതിൻ്റെ ലക്ഷ്യമെന്നും ഡിപ്പാർട്ട്‌മെൻ്റ് അറിയിച്ചു. പരിശോധയിൽ ഏതെങ്കിലും വിധത്തിലുള്ള പൊരുത്തക്കേടുകൾ കണ്ടെത്തിയാൽ വിസ റദ്ദാക്കും. വിസയുള്ള വ്യക്തി യു.എസിലാണെങ്കിൽ നാടുകടത്തൽ നടപടികൾക്ക് വിധേയനാകേണ്ടിവരുമെന്നും യുഎസ് സ്റ്റേറ്റ് ഡിപ്പാർട്ട്മെന്റ് വ്യക്തമാക്കിയതായി അസോസിയേറ്റഡ് പ്രസ്സ് റിപ്പോർട്ട് ചെയ്തു.

പരിശോധനയുടെ മാനദണ്ഡങ്ങൾ

• വിസ കാലാവധി കഴിഞ്ഞിട്ടും രാജ്യത്ത് തുടരുക (overstays).
• ക്രിമിനൽ പ്രവർത്തനങ്ങളിൽ ഏർപ്പെടുക.
• പൊതുസുരക്ഷയ്ക്ക് ഭീഷണിയാകുക.
• ഏതെങ്കിലും തരത്തിലുള്ള തീവ്രവാദ പ്രവർത്തനങ്ങളിൽ ഏർപ്പെടുക.
• ഏതെങ്കിലും തീവ്രവാദ സംഘടനയെ പിന്തുണയ്ക്കുക.

പുതിയ ഭരണകൂടം അധികാരമേറ്റ ശേഷം അനധികൃത കുടിയേറ്റക്കാരെയും, സ്റ്റുഡൻ്റ്, വിസിറ്റർ എക്സ്ചേഞ്ച് വിസ ഉടമകളെയും നാടുകടത്തുന്നതിൽ ശ്രദ്ധ കേന്ദ്രീകരിച്ചിരുന്നു. എന്നാൽ, നിലവിലെ നടപടികൾ പരിശോധനാ പ്രക്രിയ കൂടുതൽ വിപുലമാക്കിയെന്നാണ് സ്റ്റേറ്റ് ഡിപ്പാർട്ട്‌മെൻ്റിൻ്റെ പുതിയ പ്രസ്താവന സൂചിപ്പിക്കുന്നത്. ഈ പുനഃപരിശോധനയിൽ വിസ ഉടമകളുടെ സോഷ്യൽ മീഡിയ അക്കൗണ്ടുകളും, മാതൃരാജ്യങ്ങളിലെ നിയമ-കുടിയേറ്റ രേഖകളും, യു.എസിൽ വെച്ച് അവർ നടത്തിയ നിയമലംഘനങ്ങളും ഉൾപ്പെടും.

പ്രസിഡൻ്റ് ട്രംപ് അധികാരത്തിൽ വന്നതിനുശേഷം, ദേശീയ സുരക്ഷ സംരക്ഷിക്കുന്നതിനുള്ള പ്രതിജ്ഞാബദ്ധതയുടെ ഭാഗമായി കഴിഞ്ഞ വർഷത്തെ അപേക്ഷിച്ച് ഇരട്ടിയിലധികം വിസകളും ഏകദേശം നാലിരട്ടിയിലധികം വിദ്യാർത്ഥി വിസകളും റദ്ദാക്കിയതായി സ്റ്റേറ്റ് ഡിപ്പാർട്ട്‌മെൻ്റ് അറിയിച്ചു. ഈ ആഴ്ച ആദ്യം, 6,000-ത്തിലധികം വിദ്യാർത്ഥി വിസകൾ റദ്ദാക്കിയതായി ഡിപ്പാർട്ട്‌മെൻ്റ് അറിയിച്ചിരുന്നു. ഇതിൽ ഭൂരിഭാഗവും നിയമലംഘനങ്ങൾ, വിസ കാലാവധി കഴിഞ്ഞിട്ടും രാജ്യത്ത് തുടർന്നത്, മദ്യപിച്ച് വാഹനമോടിക്കൽ, ആക്രമണ കേസുകൾ, തീവ്രവാദത്തെ പിന്തുണയ്ക്കൽ തുടങ്ങിയ കുറ്റകൃത്യങ്ങളുമായി ബന്ധപ്പെട്ടതാണ്. ഈ 6,000 കേസുകളിൽ ഏകദേശം 4,000 വിസകൾ നിയമലംഘനങ്ങൾ കാരണവും 200-300 വിസകൾ തീവ്രവാദവുമായി ബന്ധപ്പെട്ട പ്രശ്നങ്ങൾ കാരണവുമാണ് റദ്ദാക്കിയത്.