വാഷിംഗ്ടൺ: യുഎസ് നിയമങ്ങൾ ലംഘിക്കുകയും വിസ കാലാവധി കഴിഞ്ഞിട്ടും രാജ്യത്ത് തങ്ങുകയും ചെയ്ത 6,000-ത്തിലധികം വിദേശ വിദ്യാർത്ഥികളുടെ വിസകൾ റദ്ദാക്കിയതായി സ്റ്റേറ്റ് ഡിപ്പാർട്ട്‌മെൻ്റ് അറിയിച്ചു. ആക്രമണം, മദ്യപിച്ച് വാഹനമോടിക്കൽ (DUI), മോഷണം, കൂടാതെ 'തീവ്രവാദത്തിന് പിന്തുണ നൽകൽ' എന്നിവയാണ് വിസ റദ്ദാക്കാൻ പ്രധാന കാരണമായി ഏജൻസി ചൂണ്ടിക്കാട്ടിയത്.

റദ്ദാക്കിയ 6,000 വിസകളിൽ ഏകദേശം 4,000 എണ്ണം നിയമലംഘനങ്ങൾ നടത്തിയതിനാണ്.'INA 3B' അനുസരിച്ച് 'തീവ്രവാദ' പ്രവർത്തനങ്ങൾ നടത്തിയതിൻ്റെ പേരിൽ 200-300 വിസകളും റദ്ദാക്കിയിട്ടുണ്ട്.ഡൊണാൾഡ് ട്രംപ് ഭരണകൂടം കുടിയേറ്റത്തിനും അന്താരാഷ്ട്ര വിദ്യാർത്ഥികൾക്കുമെതിരെ സ്വീകരിക്കുന്ന കർശന നിലപാടുകളുടെ ഭാഗമായാണ് ഈ നടപടി.

'തീവ്രവാദത്തിന് പിന്തുണ നൽകൽ' എന്നതുകൊണ്ട് എന്താണ് ഉദ്ദേശിക്കുന്നതെന്ന് സ്റ്റേറ്റ് ഡിപ്പാർട്ട്‌മെൻ്റ് വ്യക്തമാക്കുന്നില്ലെങ്കിലും, ട്രംപ് ഭരണകൂടം പലസ്തീൻ അനുകൂല പ്രക്ഷോഭകരെ ലക്ഷ്യമിട്ടതായി ആരോപണമുയർന്നിരുന്നു. ഇവർ യഹൂദ വിരുദ്ധമായ പെരുമാറ്റങ്ങൾ പ്രകടിപ്പിച്ചുവെന്നും ഭരണകൂടം ആരോപിച്ചിരുന്നു.

ഈ വർഷം ആദ്യം അന്താരാഷ്ട്ര വിദ്യാർത്ഥികൾക്കായുള്ള വിസ അപ്പോയിൻ്റ്‌മെൻ്റുകൾ ട്രംപ് ഭരണകൂടം താൽക്കാലികമായി നിർത്തിവെച്ചിരുന്നു. പിന്നീട് ജൂണിൽ അപേക്ഷകൾ പുനരാരംഭിച്ചപ്പോൾ, അപേക്ഷകരോട് അവരുടെ സോഷ്യൽ മീഡിയ അക്കൗണ്ടുകൾ പൊതുവാക്കാനും കൂടുതൽ സൂക്ഷ്മപരിശോധനക്ക് വിധേയമാക്കാനും ആവശ്യപ്പെട്ടു.

'യുഎസിലെ പൗരന്മാർ, സംസ്കാരം, സർക്കാർ, സ്ഥാപനങ്ങൾ, അല്ലെങ്കിൽ സ്ഥാപക തത്വങ്ങൾ എന്നിവയോടുള്ള ശത്രുതയുടെ ഏതെങ്കിലും സൂചനകൾ' കണ്ടെത്താൻ ശ്രമിക്കുമെന്നും അറിയിച്ചിരുന്നു. കൂടാതെ, 'അന്താരാഷ്ട്ര ഭീകരരെയും ദേശീയ സുരക്ഷയ്ക്ക് ഭീഷണിയായവരെയും പിന്തുണയ്ക്കുന്നവർ, അല്ലെങ്കിൽ നിയമവിരുദ്ധമായ യഹൂദ വിരുദ്ധ പീഡനങ്ങളോ അക്രമങ്ങളോ നടത്തുന്നവർ' എന്നിവരെയും പരിശോധിക്കാൻ സ്റ്റേറ്റ് ഡിപ്പാർട്ട്‌മെൻ്റ് ഉദ്യോഗസ്ഥർക്ക് നിർദേശം നൽകിയിട്ടുണ്ട്. ട്രംപ് ഭരണകൂടത്തിന്റെ ഈ നീക്കത്തെ ഡെമോക്രാറ്റുകൾ ശക്തമായി എതിർത്തിട്ടുണ്ട്. ഇത് നിയമപരമായ നടപടികൾക്ക് നേരെയുള്ള കടന്നുകയറ്റമാണെന്ന് അവർ ആരോപിച്ചു.