സമാധാനത്തിന് മുന്നോടിയായി പ്രതിരോധക്കോട്ട കെട്ടാൻ നീക്കവുമായി യുക്രൈൻ. യുക്രെയ്ൻ്റെ പ്രതിരോധ മേഖലയെ ശക്തിപ്പെടുത്തുന്നതിനും ഭാവിയിൽ അമേരിക്കയുടെ സുരക്ഷാ ഉറപ്പാക്കാനുമാണ് തന്ത്രപരമായ പുതിയൊരു നീക്കം യുക്രെയ്ൻ മുന്നോട്ട് വെച്ചിരിക്കുന്നത്.

ഫിനാൻഷ്യൽ ടൈംസ് റിപ്പോർട്ട് അനുസരിച്ച്, അമേരിക്കൻ ആയുധങ്ങൾ വാങ്ങുന്നതിനായി യൂറോപ്പ് ധനസഹായം നൽകുന്ന 100 ബില്യൺ ഡോളറിൻ്റെ ഒരു പ്രതിരോധ പാക്കേജ് ആണ് യുക്രൈൻ ആവശ്യപ്പെട്ടിരിക്കുന്നത്. ഇതിന് പകരമായി സമാധാന ഉടമ്പടിക്ക് ശേഷം അമേരിക്ക തങ്ങൾക്ക് സുരക്ഷാ ഉറപ്പുകൾ നൽകണമെന്ന് യുക്രെയ്ൻ ആവശ്യപ്പെടുന്നു.

റഷ്യയുമായുള്ള സന്ധി സംഭാഷണങ്ങൾക്കു ശേഷം യുക്രെയ്ൻ്റെ സുരക്ഷ ഉറപ്പാക്കുക എന്ന ലക്ഷ്യത്തോടെയാണ് ഈ നീക്കം. ഇതിൻ്റെ ഭാഗമായി, യുഎസ് കമ്പനി കളുമായി ചേർന്ന് ഡ്രോൺ നിർമ്മിക്കുന്നതിനായി 50 ബില്യൺ ഡോളറിൻ്റെ മറ്റൊരു കരാറും കൈവ് മുന്നോട്ടു വെച്ചു. ഡോണൾഡ് ട്രംപുമായി വൈറ്റ് ഹൗസിൽ ചർച്ച നടത്തുന്നതിന് മുന്നോടിയായി വോളോഡിമിർ സെലെൻസ്കി ഈ നിർദേശങ്ങൾ യൂറോപ്യൻ രാജ്യങ്ങളുമായി പങ്കുവെച്ചിരുന്നു.

അലാസ്കയിൽ വച്ച് റഷ്യൻ പ്രസിഡൻ്റ് വ്‌ളാഡിമിർ പുടിനുമായി ട്രംപ് നടത്തിയ കൂടിക്കാഴ്ചയ്ക്ക് പിന്നാലെയാണ് വൈറ്റ് ഹൗസിൽ വെച്ച് സെലെൻസ്കിയുമായും യൂറോപ്യൻ സഖ്യകക്ഷികളുമായും ട്രംപ് ചർച്ച നടത്തിയത്. ഈ കൂടിക്കാഴ്ചയിൽ, റഷ്യയുമായുള്ള ഏത് സമാധാന ഉടമ്പടിയിലും യുക്രെയ്ൻ്റെ സുരക്ഷ ഉറപ്പാക്കുന്നതിൽ അമേരിക്കക്ക് ഒരു പങ്കുണ്ടാകുമെന്ന് ട്രംപ് സെലെൻസ്കിക്ക് ഉറപ്പ് നൽകിയതാണ് സൂചന. എന്നിരുന്നാലും, ഈ ഉറപ്പുകളുടെ വിശദാംശങ്ങൾ ഇനിയും വ്യക്തമാക്കേണ്ടതുണ്ട്.

അതേസമയം യുക്രെയ്ൻ അവർ മുന്നോട്ടു വെക്കുന്ന ആവശ്യങ്ങളുടെ കൂടുതൽ വിശദാംശങ്ങൾ ഇനിയും പുറത്തുവിട്ടിട്ടില്ല. എങ്കിലും നഗരങ്ങളെയും പ്രധാന കേന്ദ്രങ്ങളെയും സംരക്ഷിക്കുന്നതിനായി കുറഞ്ഞത് 10 അമേരിക്കൻ നിർമ്മിത പാട്രിയറ്റ് വ്യോമ പ്രതിരോധ സംവിധാനങ്ങൾ, അധിക മിസൈൽ സംവിധാനങ്ങൾ, മറ്റ് സൈനിക ഉപകരണങ്ങൾ എന്നിവ തങ്ങൾക്ക് ആവശ്യമാണെന്ന് യുക്രേനിയൻ അധികാരികളോട് ആവശ്യപ്പെട്ടതായാണ് സൂചന.

വാഷിംഗ്ടണുമായി സഹകരിച്ച് സ്വന്തം പ്രതിരോധ മേഖലയെ ശക്തിപ്പെടുത്താനുള്ള ഒരു പ്രധാന നീക്കമായിട്ടാണ് യുക്രെയ്ൻ ഈ പദ്ധതിയെ കാണുന്നത്. എന്നാൽ, 50 ബില്യൺ ഡോളറിൻ്റെ ഡ്രോൺ പദ്ധതിയിൽ ഫണ്ടുകൾ എങ്ങനെ വിനിയോഗിക്കുമെന്നതിനെക്കുറിച്ച് വ്യക്തമായ വിവരങ്ങൾ ലഭ്യമല്ല.