റഷ്യ യുക്രൈൻ യുദ്ധം അവസാനിപ്പിക്കാൻ സമാധാന ഫോർമുലയുമായി അമേരിക്കൻ പ്രസിഡന്റ് ഡൊണാൾഡ് ട്രംപ്. റഷ്യയുമായുള്ള യുദ്ധം അവസാനിപ്പിക്കാൻ യുക്രെയ്ൻ പ്രസിഡന്റ് വൊളോഡിമിർ സെലെൻസ്‌കിയോട് ആവശ്യപ്പെട്ട് യു.എസ്. പ്രസിഡന്റ് ഡൊണാൾഡ് ട്രംപ്. യുദ്ധം ഉടനടി അവസാനിപ്പിക്കാൻ സെലെൻസ്‌കിക്ക് സാധിക്കുമെന്നും, അല്ലെങ്കിൽ യുദ്ധം തുടരാമെന്നും ട്രംപ് വ്യക്തമാക്കി.ട്രൂത്ത് സോഷ്യൽ പ്ലാറ്റ്‌ഫോമിലൂടെയാണ് ട്രംപ് ഈ പ്രസ്താവന നടത്തിയത്.
കഴിഞ്ഞയാഴ്ച അലാസ്കയിൽ റഷ്യൻ പ്രസിഡന്റ് വ്ലാഡിമിർ പുടിനുമായി നടത്തിയ ചർച്ചകൾക്ക് ശേഷം, യുക്രെയ്‌നിൽ ശാശ്വത സമാധാനം ഉറപ്പാക്കുന്ന ഒരു കരാറുണ്ടാക്കാൻ ട്രംപ് സെലെൻസ്‌കിയോട് ആവശ്യപ്പെട്ടിരുന്നു. "റഷ്യയുമായി വലിയ പുരോഗതി" ഉണ്ടായെന്നും ട്രംപ് ഒരു സോഷ്യൽ മീഡിയ പോസ്റ്റിൽ സൂചിപ്പിച്ചു. എന്നാൽ, കൂടുതൽ വിവരങ്ങൾ അദ്ദേഹം നൽകിയിരുന്നില്ല. പിന്നാലെയാണ് ഇപ്പോൾ സമാധാന നിർദേശങ്ങളുമായി രംഗത്തെത്തിയിരിക്കുന്നത്.
2014-ൽ റഷ്യ പിടിച്ചെടുത്ത ക്രിമിയ യുക്രെയ്‌നിന് തിരികെ ലഭിക്കില്ലെന്നും, റഷ്യയുടെ എതിർപ്പ് നിലനിൽക്കുന്നതിനാൽ യുക്രെയ്‌നിനെ നാറ്റോയിൽ (നോർത്ത് അറ്റ്ലാന്റിക് ട്രീറ്റി ഓർഗനൈസേഷൻ) ഉൾപ്പെടുത്താൻ സാധിക്കില്ലെന്നും ട്രംപ് വ്യക്തമാക്കി. 2014-ൽ ഒബാമയുടെ ഭരണകാലത്ത് നടന്ന ക്രിമിയൻ അധിനിവേശത്തെക്കുറിച്ചും ട്രംപ് പരാമർശിച്ചു. അന്ന്, ഒരു റഷ്യൻ അനുകൂല പ്രസിഡന്റ് യൂറോപ്യൻ യൂണിയൻ കരാർ നിരസിച്ചതിനെത്തുടർന്ന് യുക്രെയ്ൻ പാർലമെന്റ് അദ്ദേഹത്തെ പുറത്താക്കിയിരുന്നു.
ഇതിനെ പാശ്ചാത്യ പിന്തുണയുള്ള അട്ടിമറിയായി കണക്കാക്കിയ റഷ്യ, റഷ്യൻ വംശജരെയും തങ്ങളുടെ താൽപര്യങ്ങളെയും സംരക്ഷിക്കുന്നതിനായി ക്രിമിയ പിടിച്ചടക്കുകയായിരുന്നു. 2014 മാർച്ച് 21-ന് റഷ്യ ക്രിമിയയെ തങ്ങളുടെ രാജ്യത്തോട് നിയമപരമായി കൂട്ടിച്ചേർത്തു.
തിങ്കളാഴ്ച വാഷിംഗ്ടണിൽ സെലെൻസ്‌കിയെയും യൂറോപ്യൻ നേതാക്കളെയും ട്രംപ് സ്വീകരിക്കാൻ ഒരുങ്ങുകയാണ്. "നാളെ വൈറ്റ് ഹൗസിൽ വലിയ ദിവസമാണ്. ഇത്രയധികം യൂറോപ്യൻ നേതാക്കളെ ഒരേസമയം ആതിഥേയത്വം വഹിക്കുന്നത് ഇതാദ്യമാണ്. ഇത് എനിക്ക് വലിയ ബഹുമതിയാണ്," ട്രംപ് ട്രൂത്ത് സോഷ്യലിൽ കുറിച്ചു.
റഷ്യ ഒരു വലിയ ശക്തിയാണ്. എന്നാൽ യുക്രെയ്ൻ അങ്ങനെയല്ലെന്നും ട്രംപ് ഓർമ്മിപ്പിച്ചു. അതിനാൽ യുദ്ധം അവസാനിപ്പിക്കാൻ യുക്രെയ്ൻ ഒരു കരാറുണ്ടാക്കണമെന്നും ട്രംപ് പറഞ്ഞു. ഭൂരിഭാഗം മുൻനിരകളും മരവിപ്പിക്കാമെന്നും പകരം യുക്രെയ്ൻ ഡൊനെറ്റ്സ്ക് മുഴുവൻ വിട്ടുനൽകണമെന്നുമുള്ള പുടിന്റെ വാഗ്ദാനത്തെക്കുറിച്ച് ട്രംപ് സെലെൻസ്‌കിയെ അറിയിച്ചെങ്കിലും, സെലെൻസ്‌കി ഈ നിർദേശം നിരസിച്ചു.