അറ്റ്ലാന്റിക് സമുദ്രത്തിൽ രൂപംകൊണ്ട എറിൻ ചുഴലിക്കാറ്റ് (Erin hurricane) ശക്തി പ്രാപിക്കുന്നു. മണിക്കൂറിൽ 260 കിലോമീറ്റർ വേ​ഗതയിലാണ് കാറ്റ് വീശുന്നത്. നിലവിൽ അഞ്ചാം കാറ്റ​ഗറിയിൽ ഉൾപ്പെട്ട ചുഴലിക്കാറ്റായാണ് എറിനെ കണക്കാക്കിയിരിക്കുന്നത്. വാരാന്ത്യത്തിൽ എറിൻ ലീവാർഡ് ദ്വീപുകൾ, വിർജിൻ ദ്വീപുകൾ, പ്യൂർട്ടോ റിക്കോ എന്നിവയുടെ വടക്ക് ഭാഗത്തേക്ക് കടന്നുപോകുമെന്നാണ് പ്രതീക്ഷിക്കുന്നത്.

എറിൻ ചുഴലിക്കാറ്റ് 15 സെന്റീമീറ്റർ വരെ മഴ പെയ്യുന്നതിന് കാരണമാകും. കൂടാതെ മിന്നൽ പ്രളയത്തിനും മണ്ണിടിച്ചിലിനും സാധ്യതയുണ്ട്. ഈ വർഷം അറ്റ്ലാന്റിക് സമുദ്രത്തിൽ രൂപം കൊണ്ട ആദ്യത്തെ ചുഴലിക്കാറ്റാണ് എറിൻ. ഇത് അമേരിക്കയുടെ പ്രധാന ഭൂപ്രദേശത്ത് കരയിലേക്ക് പതിക്കുമെന്ന് നിലവിൽ പ്രവചിക്കപ്പെട്ടിട്ടില്ല. കൊടുങ്കാറ്റ് 24 മണിക്കൂറിനുള്ളിൽ കുറഞ്ഞത് 34 മൈൽ വേഗതയിൽ ശക്തി പ്രാപിക്കുമെന്നും റിപ്പോർട്ട്.

അടുത്തയാഴ്ചയോടെ എറിൻ ചുഴലിക്കാറ്റ് ക്രമേണ വടക്കോട്ട് നീങ്ങുമെന്നും, ബഹാമാസിന്റെ കിഴക്ക് കടന്ന് നോർത്ത് കരോലിനയുടെ ഔട്ടർ ബാങ്കുകൾ വരെ എത്തുമെന്നും പ്രവചനം. ഇതിന്റെ ഫലമായി അമേരിക്കയുടെ കിഴക്കൻ തീരത്ത് കനത്ത മഴയ്ക്കും ഉയർന്ന തിരമാലകൾക്കും സാധ്യത. ഫ്ലോറിഡയിലും മധ്യ-അറ്റ്ലാന്റിക് സംസ്ഥാനങ്ങളിലും ജാ​ഗ്രത നിർദേശം.

ശക്തമായ കാറ്റ് കാരണം, യുഎസ് വിർജിൻ ദ്വീപുകളിലെ സെന്റ് തോമസ്, സെന്റ് ജോൺ എന്നിവിടങ്ങളിലെ തുറമുഖങ്ങളിലും സാൻ ജുവാൻ ഉൾപ്പെടെ പ്യൂർട്ടോ റിക്കോയിലെ ആറ് മുനിസിപ്പാലിറ്റികളിലും കപ്പലുകൾക്ക് യുഎസ് കോസ്റ്റ് ഗാർഡ് നിയന്ത്രണങ്ങൾ ഏർപ്പെടുത്തി.

യുഎസ് സർക്കാരിന്റെ പ്രാഥമിക കാലാവസ്ഥാ ഏജൻസിയായ നാഷണൽ ഓഷ്യാനിക് ആൻഡ് അറ്റ്മോസ്ഫെറിക് അഡ്മിനിസ്ട്രേഷൻ (നോവ) ഈ വർഷം സാധാരണയിൽ കൂടുതൽ അറ്റ്ലാന്റിക് ചുഴലിക്കാറ്റ് ഉണ്ടാകാനുള്ള സാധ്യത പ്രവചിച്ചു. കൂടാതെ ആഗോളതാപനം മൂലം കാറ്റഗറി നാലിലും അഞ്ചിലും എത്തുന്ന ഉഷ്ണമേഖലാ കൊടുങ്കാറ്റുകളുടെ എണ്ണം വർദ്ധിക്കുമെന്ന് പ്രവചിക്കപ്പെടുന്നു.