ഇന്ത്യയ്ക്ക് മേൽ ഉയർന്ന തീരുവ ചുമത്താനുള്ള യുഎസ് പ്രസിഡന്റ് ഡൊണാൾഡ് ട്രംപിന്റെ(Donald Trump) തീരുമാനത്തിനെതിരെ വിമർശനവുമായി പ്രമുഖ യുഎസ് സാമ്പത്തിക ശാസ്ത്രജ്ഞൻ ജെഫ്രി സാച്ച്സ് (Jeffrey D Sachs). അത് മണ്ടത്തരവും വ്യാമോഹവുമാണെന്നാണ് ജെഫ്രി സാച്ച്സ് അഭിപ്രായപ്പെട്ടത്.
ഇങ്ങനെ ചെയ്യുന്നതുകൊണ്ട് യാതൊരു വിധത്തിലുള്ള പ്രയോജനവുമില്ലെന്നും അദ്ദേഹം പറഞ്ഞു. ഇന്ത്യ, ചൈന, റഷ്യ, ബ്രസീൽ, ദക്ഷിണാഫ്രിക്ക എന്നിവ ഉൾപ്പെടുന്ന ബ്രിക്സ് കൂട്ടായ്മയോടുള്ള ശത്രുതയാണ് ട്രംപിനെ ഇത്തരം തീരുമാനങ്ങളിലേക്ക് നയിക്കുന്നതെന്നും വാർത്താ ഏജൻസിയായ എഎൻഐക്ക് നൽകിയ അഭിമുഖത്തിൽ ജെഫ്രി സാച്ച്സ് ആരോപിച്ചു.
റഷ്യയിൽ നിന്നുള്ള എണ്ണ വാങ്ങിക്കുന്നതിന്റെ പേരിൽ ഇന്ത്യയിൽ നിന്നും ഇറക്കുമതി ചെയ്യുന്ന ഉത്പന്നങ്ങൾക്ക് 50% തീരുവ ചുമത്തിയത് അമേരിക്കൻ സമ്പദ്‌വ്യവസ്ഥയ്ക്ക് ദോഷകരമാണെന്നും അന്താരാഷ്ട്ര നിയമങ്ങളുടെ ലംഘനമാണെന്നും സാമ്പത്തിക വിദഗ്ധൻ മുന്നറിയിപ്പ് നൽകി.
ദീർഘകാല തന്ത്രപരമായ സുരക്ഷയ്‌ക്കോ വ്യാപാര നേട്ടങ്ങൾക്കോ വേണ്ടി ഇന്ത്യ അമേരിക്കയെ ആശ്രയിക്കരുതെന്നും ജെഫ്രി സാക്‌സ് ആവശ്യപ്പെട്ടു. ചൈനയ്‌ക്കെതിരായ ക്വാഡിൽ അമേരിക്കയ്‌ക്കൊപ്പം നിന്നാൽ ഇന്ത്യ ദീർഘകാല സുരക്ഷ കൊയ്യാൻ പോകുന്നില്ല. ലോകത്ത് സ്വതന്ത്രമായ നിലപാടുള്ള ഒരു വലിയ ശക്തിയാണ് ഇന്ത്യയെന്നും അദ്ദേഹം വിശേഷിപ്പിച്ചു.