ഫുട്ബോൾ ഇതിഹാസം ലയണല്‍ മെസി ഡിസംബറില്‍ ഇന്ത്യ സന്ദർശിക്കും. ഇന്ത്യയിലേക്ക് വരാന്‍ മെസിയുടെ ഏജന്‍റ് കൂടിയായ പിതാവ് ജോര്‍ജെ മെസിയുടെയും സംഘത്തിന്‍‍‍റെയും അനുമതി ലഭിച്ചതായി കൊൽക്കത്തയിലെ വ്യവസായി സതാദ്രു ദത്ത വാര്‍ത്താ ഏജന്‍സിയായ പിടിഐയോട് പ്രതികരിച്ചു.

‘ഗോട്ട് ടൂർ ഓഫ് ഇന്ത്യ’ എന്ന പേരിലായിരിക്കും മെസിയുടെ ഇന്ത്യ സന്ദര്‍ശനം അറിയപ്പെടുകയെന്നും ഈ മാസം 28നും സെപ്റ്റംബര്‍ ഒന്നിനും ഇടയില്‍ മെസി തന്നെ ഈ വിവരം സമൂഹമാധ്യമങ്ങളിലൂടെ ഔദ്യോഗികമായി പുറത്തുവിടുമെന്നും സതാദ്രു ദത്ത പറഞ്ഞു. ഡിസംബർ 12നാണ് മെസി ഇന്ത്യയിലെത്തുക.

4 ന​ഗരങ്ങളാണ് സന്ദർശിക്കുക. ഡിസംബർ 13ന് അഹമ്മദാബാദ്, 14ന് മുംബൈ, 15ന് ദില്ലി. ദില്ലിയിലെത്തുന്ന താരം പ്രധാനമന്ത്രി മോദിയുമായി കൂടിക്കാഴ്ച്ച നടത്തുകയും വിവിധ പരിപാടികളില്‍ പങ്കെടുക്കുമെന്നും സതാദ്രു ദത്ത പറഞ്ഞു.

മെസിക്കൊപ്പം ഇന്‍റര്‍ മിയാമി ടീം അംഗങ്ങളായ റോഡ്രിഗോ ഡീ പോള്‍, ലൂയി സുവാരസ്, ജോര്‍ഡി ആല്‍ബ, സെര്‍ജിയോ ബുസ്‌കെറ്റ്സ് എന്നിവരുമുണ്ടാകാൻ സാധ്യത. എന്നാൽ ഈ വിവരം ഔദ്യോ​ഗികമായി സ്ഥിരീകരിച്ചിട്ടില്ല.