തെരുവ് നായ്ക്കളെ പിടികൂടുന്നതിൽ തടസ്സമുണ്ടാക്കിയാൽ കർശന നടപടി സ്വീകരിക്കുമെന്ന് സുപ്രീം കോടതി. പേവിഷബാധമരണങ്ങൾ ചൂണ്ടിക്കാട്ടിയാണ് സുപ്രീംകോടതിയുടെ സുപ്രധാനമായ ഉത്തരവ്.

മൃഗസ്നേഹികളെ രൂക്ഷമായി വിമർശിച്ച സുപ്രീംകോടതി പേവിഷബാധയേറ്റ് മരിക്കുന്ന കുട്ടികൾക്ക് ജീവൻ തിരിച്ചു നൽകാൻ ഈ മൃഗസ്നേഹികൾക്കും സന്നദ്ധപ്രവർത്തകർക്കും സാധിക്കുമോ എന്നും ചോദിച്ചു.

തെരുവുനായയുടെ കടിയേറ്റ് പേവിഷബാധയുണ്ടാകുന്നത് സംബന്ധിച്ച് പത്രവാർത്ത അടിസ്ഥാനമാക്കിയാണ് ജൂലൈ 28ന് കോടതി സ്വമേധയാ കേസെടുത്തത്. ജസ്റ്റിസുമാരായ ജെബി പർദിവാല, ആർ മഹാദേവൻ എന്നിവരുടെ ബെഞ്ചിന്റേതാണ് സുപ്രധാനമായ ഉത്തരവ്.

സുപ്രീംകോടതിയുടെ ഈ ഉത്തരവ് ഡൽഹിയിലെ വിഷയത്തെ സംബന്ധിച്ചുള്ളതാണെങ്കിലും, മറ്റിടങ്ങളിലെ പ്രശ്ന പരിഹാരത്തിനും വഴിയൊരുക്കുന്നതാണ്. പൊതുതാൽപര്യം മുൻനിർത്തിയാണ് ഉത്തരവെന്നും തങ്ങൾക്കിതിൽ താൽപര്യമില്ലെന്നും കോടതി വ്യക്തമാക്കി.

കുറച്ചുപേർ തങ്ങൾ മൃഗസ്നേഹികൾ ആണെന്നോ മറ്റോ കരുതുന്നതിന്റെ പേരിൽ കുഞ്ഞുങ്ങളെ ബലി കൊടുക്കാൻ ആകില്ലെന്നും കോടതി പറഞ്ഞു. ഇനിയെങ്കിലും ആവശ്യമായ നടപടികൾ സ്വീകരിക്കണമെന്നും ബെഞ്ച് വ്യക്തമാക്കി.