ന്യൂഡൽഹി: പാക് സൈനിക മേധാവി അസിം മുനീറിന്റെ അമേരിക്കൻ സന്ദർശനത്തിനു പിന്നാലെ പാക്കിസ്ഥാനെ പ്രീതിപ്പെടുത്തുന്ന പ്രഖ്യാപനവുമായി അമേരിക്ക.
ബലൂചിസ്ഥാൻ ലിബറേഷൻ ആർമിയെയും (ബിഎൽഎ) അതിന്റെ സായുധ വിഭാഗമായ മജീദ് ബ്രിഗേഡിനെയും വിദേശ ഭീകര സംഘടനകളായി (എഫ്‌ടിഒ) ഔദ്യോഗികമായി പ്രഖ്യാപിച്ചു.
യുഎസ് സ്റ്റേറ്റ് ഡിപ്പാർട്ട്മെന്റ് ആണ് ഈ വിവരം സ്ഥിരീകരിച്ചത്. പാക്കിസ്ഥാനെ സംബന്ധിച്ച് ഏറെ ആശ്വാസം നൽകുന്ന പ്രഖ്യാപനമാണ് അമേരിക്ക നടത്തിയിരിക്കുന്നത്. ഈ സംഘത്തെ പാകിസ്ഥാൻ നേരത്തെ ഭീകര സംഘടനയായി പ്രഖ്യാപിച്ചിരുന്നു.
ബലൂചിസ്ഥാൻ ലിബറേഷൻ ആർമിക്ക് സഹായങ്ങൾ നൽകുന്നത് ഇന്ത്യ ആണെന്നാണ് പാക്കിസ്ഥാൻ എന്നും ആരോപിക്കുന്നത്. ഭീകരതയെ ചെറുക്കുന്നതിനുള്ള ട്രംപ് ഭരണകൂടത്തിന്റെ പ്രതിബദ്ധതയാണ് ഈ നീക്കം തെളിയിക്കുന്നതെന്ന് യുഎസ് സ്റ്റേറ്റ് സെക്രട്ടറി മാർക്കോ റൂബിയോ ഒരു പ്രസ്താവനയിൽ പറഞ്ഞു.
അതേസമയം പഹൽഗാം ഭീകരാക്രമണത്തിൽ 26 ഇന്ത്യക്കാരെ നിഷ്ഠൂരമായി കൊലപ്പെടുത്തിയ ദി റെസിസ്റ്റൻസ് ഫ്രണ്ടെന്ന ലഷ്‌കർ ഇ തൊയ്ബെയുടെ സംഘത്തിനെയും അമേരിക്ക നേരത്തെ ഭീകര സംഘടനയായി പ്രഖ്യാപിച്ചിരുന്നു.
പാകിസ്ഥാനിലെ ഏറ്റവും വലുതും എന്നാൽ ഏറ്റവും ജനസംഖ്യ കുറഞ്ഞതും ദരിദ്രവുമായ പ്രവിശ്യയാണ് ബലൂചിസ്ഥാൻ. 1947-ൽ പാകിസ്ഥാൻ രൂപീകൃതമായതിനുശേഷം ഈ മേഖലയിൽ കുറഞ്ഞത് അഞ്ച് വിഘടനവാദ പ്രക്ഷോഭങ്ങളെങ്കിലും ഉണ്ടായിട്ടുണ്ട്.