ന്യൂഡൽഹി: ഇന്ത്യക്കെതിരെ ആണവായുധ ഭീഷണിയുമായി പാക് സൈനിക മേധാവി അസിം മുനീർ. പാക്കിസ്ഥാൻ ആണവായുധം ഉള്ള രാജ്യമാണെന്നും, തങ്ങൾ തകരുകയാണെന്ന് തോന്നിയാൽ ലോകത്തെ പകുതി രാജ്യങ്ങളും ഇല്ലാതാക്കും എന്നായിരുന്നു അസിം മുനീറിന്റെ പരാമർശം. അമേരിക്കയിലെ ഫ്ലോറിഡയിൽ പാക് ബിസിനസുകാർക്ക് ഒരുക്കിയ വിരുന്നിലാണ് പാക്കിസ്ഥാൻ സൈനിക മേധാവിയുടെ വെല്ലുവിളി.

സിന്ധു നദിയിൽ ഇന്ത്യ ഡാം പണിതാൽ അത് തകർക്കുമെന്നും ഭീഷണി ഉയർത്തി. ഇന്ത്യ അണക്കെട്ട് പണിയുന്നതുവരെ കാത്തിരിക്കുമെന്നും, നിർമ്മാണം കഴിഞ്ഞാൽ 10 മിസൈലുകൾ ഉപയോഗിച്ച് അത് നശിപ്പിക്കുമെന്നും പറഞ്ഞു. സിന്ധു നദി ഇന്ത്യക്കാരുടെ കുടുംബ സ്വത്തല്ല. തങ്ങൾക്ക് മിസൈലുകൾക്ക് ഒരു കുറവും ഇല്ലെന്നും അസിം മുനീർ വെല്ലുവിളിച്ചു. ഇതാദ്യമായാണ് മൂന്നാമതൊരു രാജ്യത്തിനെതിരെ അമേരിക്കയുടെ മണ്ണിൽ നിന്ന് ആണവ ഭീഷണി ഉയരുന്നത് എന്നതും ശ്രദ്ധേയം.

രണ്ടുമാസത്തിനുള്ളിൽ ഇത് രണ്ടാം തവണയാണ് പാക്കിസ്ഥാൻ കരസേനാ മേധാവി അമേരിക്കയിലെ ഉന്നത സൈനിക ഉദ്യോഗസ്ഥരെ കാണുന്നതിനായി അമേരിക്ക സന്ദർശിക്കുന്നത്. മുനീർ യുഎസ് ജോയിന്റ് ചീഫ് ഓഫ് സ്റ്റാഫ് ജനറൽ ജോൺ ഡാൻ കെയ്നുമായി ചർച്ച നടത്തുകയും പാക്കിസ്ഥാൻ സന്ദർശിക്കാൻ അദ്ദേഹത്തെ ക്ഷണിക്കുകയും ചെയ്തു എന്നും റിപ്പോർട്ട്.