ചാൾസ്റ്റൺ(വെസ്റ്റ് വിർജീനിയ): വെസ്റ്റ് വിർജീനിയയിൽ നിയമവിരുദ്ധമായി താമസിക്കുന്ന 29 കാരനായ ഇന്ത്യൻ പൗരൻ ആകാശ് പ്രകാശ് മക്വാന വ്യാജ വിവാഹം നടത്തി യുണൈറ്റഡ് സ്റ്റേറ്റ്സിൽ താമസിക്കാൻ ശ്രമിച്ചതായി കുറ്റസമ്മതം നടത്തി. 2025 സെപ്റ്റംബർ 26 ന് മക്വാനക്കു ശിക്ഷ വിധിക്കും .മക്വാനക്കു ജയിൽ ശിക്ഷയും പിഴയും നാടുകടത്തലും നേരിടേണ്ടിവരും.

മക്വാന റോൺസെവെർട്ടിൽ താമസിക്കുകയും അനുമതിയില്ലാതെ ജോലി ചെയ്യുകയും ചെയ്തു. 2019 നവംബറിൽ ജെ-1 വിസയിൽ യുഎസിൽ എത്തിയെങ്കിലും 2020 ൽ അത് കാലഹരണപ്പെട്ടതിന് ശേഷം നിയമവിരുദ്ധമായി താമസിച്ചു.

2021 ഓഗസ്റ്റിൽ, ഗ്രീൻ കാർഡ് ലഭിക്കുന്നതിനായി ഒരു യുഎസ് പൗരയെ വിവാഹം കഴിക്കാൻ മക്വാന $10,000 നൽകാൻ സമ്മതിച്ചു. 2021 സെപ്റ്റംബർ 3 ന് അവർ വിവാഹിതരായി. വിവാഹം യഥാർത്ഥമാണെന്ന് വരുത്തിത്തീർക്കാൻ, മക്വാന ഒരു പാട്ടക്കരാർ വ്യാജമായി ഉണ്ടാക്കി, പൗരന്റെ പേര് യൂട്ടിലിറ്റി ബില്ലുകളിലും ബാങ്ക് അക്കൗണ്ടുകളിലും ചേർത്തു. അനുമതിയില്ലാതെ പാട്ടക്കരാറിലുള്ള ഒരു പ്രോപ്പർട്ടി മാനേജരുടെ പേരും ഒപ്പും വ്യാജമായി ഉണ്ടാക്കിയതായി അദ്ദേഹം സമ്മതിച്ചു.

വ്യാജ വിവാഹ പദ്ധതി ഫലിക്കാതെ വന്നപ്പോൾ, യു.എസ്. പൗരനായ പങ്കാളി തന്നെ പീഡിപ്പിച്ചുവെന്ന് അവകാശപ്പെട്ട് മക്വാന യു.എസ്. ഇമിഗ്രേഷൻ ഉദ്യോഗസ്ഥർക്ക് ഒരു പരാതി നൽകി. രാജ്യത്ത് തുടരാനും ഗ്രീൻ കാർഡ് ലഭിക്കാനുള്ള സാധ്യത വർദ്ധിപ്പിക്കാനും വേണ്ടിയുള്ള നുണയാണിതെന്ന് അദ്ദേഹം പിന്നീട് സമ്മതിച്ചു.