ടാമ്പ: വേൾഡ് മലയാളി കൗൺസിൽ (WMC) ഫ്ലോറിഡ പ്രൈം പ്രൊവിൻസിൻ്റെ ഓണാഘോഷം, കുടുംബബന്ധങ്ങളുടെ ഊഷ്മളത വിളിച്ചോതുന്ന ഒരനുഭവമായി മാറി. ഓഗസ്റ്റ് 16-ന് ജോൺമൂർ റോഡ് കമ്യൂണിറ്റി സെൻ്ററിൽ വെച്ച് നടന്ന ഈ പരിപാടിയിൽ, സാമൂഹ്യ-സാംസ്കാരിക രംഗങ്ങളിലെ നിരവധി പ്രമുഖർ പങ്കെടുത്തു.
ഊഞ്ഞാലും വർണ്ണപ്പൂക്കളവും തീർത്ത തിരുവാതിര നൃത്തവും ചടങ്ങിന് ഗൃഹാതുര സ്മരണകൾ നൽകി. സെക്രട്ടറി അഞ്ജലി നായർ എം.സിയായി പ്രവർത്തിച്ച പരിപാടിയിൽ, സീനിയർ മെമ്പർ ലീലാമ്മ ബേബി നിലവിളക്ക് കൊളുത്തി ഉദ്ഘാടനം ചെയ്തു. ബ്ലെസൻ മണ്ണിൽ (അമേരിക്കൻ റീജിയൻ പ്രസിഡന്റ്), സോണിയാ തോമസ് (വൈസ് ചെയർ), രാജൂ മൈലപ്രാ (മീഡിയാ ചെയർ), കാരളിൻ ബ്ലെസൻ (ഫ്‌ളോറിഡ പ്രസിഡന്റ്), ബിജു തോണിക്കടവിൽ (ഫോമാ മുൻ ജനറൽ സെക്രട്ടറി), അഞ്ജലി നായർ (സെക്രട്ടറി), ദീപക് സതീഷ് (ട്രഷറർ), സിദ്ധാർത്ഥ് (ബിസിനസ് ഫോറം), ബേബി സെബാസ്റ്റിയൻ (പ്രൈം പ്രൊവിൻസ് സ്ഥാപക നേതാവ്) തുടങ്ങിയവർ പങ്കെടുത്തു.
പുതുതായി തിരഞ്ഞെടുക്കപ്പെട്ട WMC അമേരിക്കൻ റീജിയൻ പ്രസിഡൻ്റ് ബ്ലെസൻ മണ്ണിൽ WMC-യുടെ പ്രവർത്തനങ്ങളെക്കുറിച്ച് വിശദീകരിച്ചു. പ്രശസ്ത സാഹിത്യകാരൻ രാജു മൈലപ്രാ ഓണസന്ദേശം നൽകി. ബിജു തോണിക്കടവിൽ, ദീപക് സതീഷ് എന്നിവർ ആശംസകൾ നേർന്നു.
ശീതൾ തോമസിൻ്റെ മനോഹരമായ ഗാനാലാപനത്തിന് ശേഷം, തനി നാടൻ വിഭവങ്ങൾ ചേർത്തുള്ള ഓണസദ്യ ഒരുക്കിയിരുന്നു. സദ്യയ്ക്ക് ശേഷം നടന്ന അന്താക്ഷരി, അക്ഷരയുദ്ധം, ഫോട്ടോ ഷൂട്ട് തുടങ്ങിയ വിനോദ പരിപാടികൾ എല്ലാവർക്കും സന്തോഷം നൽകി. ഓണാഘോഷം വിജയകരമാക്കിയ സംഘാടകർക്ക്, പരിപാടിയിൽ പങ്കെടുത്ത എല്ലാവരും നന്ദി അറിയിച്ചു.