ഡാളസ്: അമേരിക്കൻ പൗരത്വം നേടുന്നതിനുള്ള അപേക്ഷകരുടെ മാനദണ്ഡങ്ങളിൽ യു.എസ് സിറ്റിസൺഷിപ്പ് ആൻഡ് ഇമിഗ്രേഷൻ സർവീസസ് (USCIS) പുതിയ മാറ്റങ്ങൾ കൊണ്ടുവന്നു. പുതിയ നിയമപ്രകാരം കുറ്റകൃത്യങ്ങളുടെ പട്ടിക മാത്രം പരിഗണിക്കാതെ, അപേക്ഷകരുടെ ജീവിതവും പെരുമാറ്റവും കൂടുതൽ സമഗ്രമായി വിലയിരുത്തും. അതായത്, അപേക്ഷകരുടെ "നല്ല സ്വഭാവം" (Good Moral Character) വിലയിരുത്തുമ്പോൾ അവരുടെ മോശം പ്രവൃത്തികൾ മാത്രമല്ല, നല്ല സ്വഭാവങ്ങളും സാമൂഹിക സംഭാവനകളും പരിഗണിക്കും.

അപേക്ഷകരുടെ പോസിറ്റീവ് വശങ്ങൾക്കും സാമൂഹിക സംഭാവനകൾക്കും കൂടുതൽ പ്രാധാന്യം നൽകുന്ന തരത്തിലാണ് മാറ്റങ്ങൾ കൊണ്ടു വന്നിരിക്കുന്നത്. പുതിയ നയപരമായ മെമ്മോറാണ്ടം (PM-602-0188) അനുസരിച്ച്, അമേരിക്കൻ പൗരത്വം നേടാൻ അപേക്ഷിക്കുന്ന വ്യക്തിയുടെ സ്വഭാവം, സാമൂഹിക നിയമങ്ങളോടുള്ള പ്രതിബദ്ധത, സമൂഹത്തിന് നൽകിയ സംഭാവനകൾ എന്നിവയെല്ലാം ബന്ധപ്പെട്ട ഉദ്യോ​ഗസ്ഥർ വിലയിരുത്തും.

ഇതിലൂടെ, കുറ്റകൃത്യങ്ങളിൽ ഏർപ്പെടാത്ത ഒരാളാണോ എന്നതിനപ്പുറം, സമൂഹത്തിൽ നല്ല രീതിയിൽ ജീവിക്കുന്ന വ്യക്തിയാണോ എന്ന് ഉദ്യോ​ഗസ്ഥർ ഉറപ്പ് വരുത്തും. സമൂഹത്തിലെ ക്ലീൻചീറ്റ് മാത്രം പോരാ, പ്രസ്തുത വ്യക്തി കുടുംബപരമായ ഉത്തരവാദിത്തങ്ങൾ നിറവേറ്റുന്നയാളാണോ യു.എസിലെ സാമൂഹിക പ്രവർത്തനങ്ങളിലുള്ള സ്ഥിരമായ പങ്കാളിത്തം ഉണ്ടോ എന്നും പരിശോധിക്കും.

കൂടാതെ ഉയർന്ന വിദ്യാഭ്യാസ യോഗ്യതയും സ്ഥിരവും നിയമപരവുമായ തൊഴിൽ ഉള്ളയാളാണോ എന്നതും പ്രധാനമാണ്. യു.എസിൽ നിയമപരമായി താമസിച്ച കാലയളവ്.നികുതിയും മറ്റ് സാമ്പത്തിക ഉത്തരവാദിത്തങ്ങളും കൃത്യമായി പാലിക്കുന്നതിൽ വീഴ്ച്ച സംഭവിച്ചിട്ടുണ്ടോ എന്നു പരിശോധിക്കും. നിയമപരമായി പ്രശ്നങ്ങളില്ലാത്തതും എന്നാൽ സമൂഹത്തിൽ ചോദ്യം ചെയ്യപ്പെടാവുന്നതുമായ പെരുമാറ്റങ്ങൾക്കും കൂടുതൽ പരിശോധനയുണ്ടാകും. ഉദാഹരണത്തിന്, ആവർത്തിച്ചുള്ള ട്രാഫിക് നിയമലംഘനങ്ങൾ, ശല്യപ്പെടുത്തലുകൾ, അല്ലെങ്കിൽ ആക്രമണോത്സുകമായ പെരുമാറ്റം എന്നിവയെല്ലാം ഇതിൽപ്പെടും.

ഒന്നിലധികം തവണ മദ്യപിച്ച് വാഹനമോടിച്ചത്, നിയമവിരുദ്ധമായി വോട്ട് ചെയ്തത്, അല്ലെങ്കിൽ ചില ലഹരിമരുന്ന് സംബന്ധമായ കേസുകൾ എന്നിവ പൗരത്വ അപേക്ഷയ്ക്ക് തടസ്സമാകും. ഈ തടസ്സങ്ങളെ മറികടക്കാൻ, വ്യക്തമായ പുനരധിവാസത്തിൻ്റെ തെളിവുകൾ ആവശ്യമായി വരും.
പുതിയ നയം പൗരത്വ അപേക്ഷകരെ വിലയിരുത്തുന്നതിൽ കൂടുതൽ സമഗ്രമായ സമീപനം ഉറപ്പാക്കുന്നു. അപേക്ഷകരുടെ പോസിറ്റീവ് വശങ്ങൾക്കും സാമൂഹിക സംഭാവനകൾക്കും കൂടുതൽ പ്രാധാന്യം നൽകുന്നതാണ് ഈ മാറ്റം. പൗരത്വം എന്നത് ഒരു ഔദ്യോഗിക നടപടി മാത്രമല്ല, രാജ്യത്തോട് കൂറും നല്ല സ്വഭാവവും ആവശ്യപ്പെടുന്ന ഒരു മാറ്റമാണെന്ന് ഏജൻസി ഊന്നിപ്പറയുന്നു.