ജയ്പൂർ: രാജസ്ഥാനിലെ ജയ്സാൽമീറിൽ നിന്നും പാക്കിസ്ഥാൻ ചാരനെന്ന് സംശയിക്കുന്ന ഒരാളെ പൊലീസ് സിഐഡി (സെക്യൂരിറ്റി) ഇന്റലിജൻസ് അറസ്റ്റ് ചെയ്തു. മഹേന്ദ്ര പ്രസാദ് (32) ആണ് അറസ്റ്റിലായത്. ഇയാൾ ചന്ദൻ ഫീൽഡ് ഫയറിംഗ് റേഞ്ചിലെ ഡിആർഡിഒ ഗസ്റ്റ് ഹൗസിന്റെ മാനേജരായി ജോലി ചെയ്തിരുന്നു.

പാകിസ്ഥാൻ രഹസ്യാന്വേഷണ ഏജൻസിയുമായി മഹേന്ദ്​ര പ്രസാദ് നിരന്തരം ബന്ധപ്പെട്ടിരുന്നതായും ഇന്ത്യയുടെ പ്രതിരോധ പ്രവർത്തനങ്ങളെക്കുറിച്ചുള്ള തന്ത്രപ്രധാനമായ വിവരങ്ങൾ ചോർത്തി നൽകിയിരുന്നതായും ആരോപിക്കപ്പെടുന്നു. രാജ്യം സ്വാതന്ത്ര്യദിനം ആഘോഷിക്കാനൊരുങ്ങുന്നതിന്റെ ഭാ​ഗമായി ദേശവിരുദ്ധ, വിധ്വംസക പ്രവർത്തനങ്ങൾക്കെതിരെ രാജസ്ഥാൻ സിഐഡി ഇന്റലിജൻസ് ശക്തമായ നിരീക്ഷണം നടത്തുന്നുണ്ടെന്ന് സിഐഡി (സെക്യൂരിറ്റി) ഐജി ഡോ. വിഷ്ണുകാന്ത് പറഞ്ഞതായി എൻ.ഡി.ടി.വി റിപ്പോർട്ട് ചെയ്തു.

അതിന്റെ ഭാ​ഗമായ നിരീക്ഷണങ്ങൾക്കിടെയാണ് ഡിആർഡിഒ ഗസ്റ്റ് ഹൗസിലെ കരാർ തൊഴിലാളിയായ മഹേന്ദ്ര പ്രസാദിന പിടികൂടുന്നത്. ഉത്തരാഖണ്ഡിലെ അൽമോറയിലെ പല്യുൻ സ്വദേശിയാണ് പ്രസാദ്. സോഷ്യൽ മീഡിയ വഴി പാകിസ്ഥാൻ രഹസ്യാന്വേഷണ ഏജൻസിയുമായി പ്രസാദ് നിരന്തരം ബന്ധപ്പെട്ടിരുന്നുവെന്ന് അന്വേഷണത്തിൽ വ്യക്തമായി.

മിസൈൽ, ആയുധ പരീക്ഷണങ്ങൾക്കായി ചന്ദൻ ഫീൽഡ് ഫയറിംഗ് റേഞ്ച് സന്ദർശിക്കുന്ന ഡിആർഡിഒ ശാസ്ത്രജ്ഞരുടെയും ഇന്ത്യൻ ആർമി ഓഫീസർമാരുടെയും നീക്കങ്ങളെക്കുറിച്ചുള്ള നിർണായകമായ വിവരങ്ങൾ ഇയാൾ തന്റെ ഹാൻഡ്‌ലർക്ക് കൈമാറിയിരുന്നതായും റിപ്പോർട്ട്. ജയ്സാൽമീറിലെ ഈ സൗകര്യം തന്ത്രപരമായ പ്രതിരോധ ഉപകരണങ്ങൾ പരീക്ഷിക്കുന്നതിനുള്ള ഒരു നിർണായക സ്ഥലമാണ്.

കസ്റ്റഡിയിലെടുത്തതിനുശേഷം, മഹേന്ദ്ര പ്രസാദിനെ സുരക്ഷാ ഏജൻസികൾ സംയുക്തമായി ചോദ്യം ചെയ്തു. ഇയാളുടെ മൊബൈൽ ഫോൺ സമഗ്രമായ സാങ്കേതിക വിശകലനത്തിന് വിധേയമാക്കി.ഡിആർഡിഒ യുടെ പ്രവർത്തനങ്ങളെക്കുറിച്ചു ഇന്ത്യൻ സൈന്യത്തിന്റെ പ്രവർത്തനങ്ങളെ കുറിച്ചുമുള്ള തന്ത്രപ്രധാനമായ വിവരങ്ങൾ അയാൾ തന്റെ പാകിസ്ഥാൻ ഹാൻഡ്‌ലറുമായി പങ്കിട്ടിട്ടുണ്ടെന്ന് അന്വേഷണത്തിലൂടെ സ്ഥിരീകരിച്ചു.

തെളിവുകളുടെ അടിസ്ഥാനത്തിൽ, ചാരവൃത്തി ആരോപിച്ച് സിഐഡി ഇന്റലിജൻസ് മഹേന്ദ്ര പ്രസാദിന്റെ അറസ്റ്റ് ഔദ്യോഗികമായി രേഖപ്പെടുത്തി. ശൃംഖലയിൽ മറ്റുള്ളവർ ഉൾപ്പെട്ടിട്ടുണ്ടോ എന്നും അധികൃതർ ഇപ്പോൾ അന്വേഷിച്ചുവരികയാണ്.

(Summary: A suspected Pakistani spy has been arrested by the CID (Security) Intelligence Unit of the Rajasthan Police from Jaisalmer. Mahendra Prasad (32) was arrested. He was working as the manager of the DRDO Guest House at Chandan Field Firing Range.)