നല്ല ദാമ്പത്യ ജീവിതം നയിക്കുന്നതിനെക്കുറിച്ച് ക്ലാസുകൾ എടുത്ത് പ്രശസ്തരായ ധ്യാനദമ്പതിമാർ തമ്മിലുണ്ടായ വഴക്കിനെത്തുടർന്ന് ഭർത്താവിനെതിരെ കേസ്. തൃശ്ശൂരിലെ ചാലക്കുടിയിൽ ഫിലോക്കാലിയ ഫൗണ്ടേഷൻ എന്ന സ്ഥാപനം നടത്തുന്ന ജിജി മാരിയോയും ഭർത്താവ് മാരിയോ ജോസഫുമാണ് കുടുംബ തർക്കത്തിനിടെ തമ്മിലടിച്ചത്. കഴിഞ്ഞ കുറച്ച് മാസങ്ങളായി തൊഴിൽ തർക്കങ്ങളെത്തുടർന്ന് ഇരുവരും അകന്നു കഴിയുകയായിരുന്നു. കുടുംബപ്രശ്നങ്ങൾ സംസാരിച്ച് പരിഹരിക്കാനായി ജിജി കഴിഞ്ഞ ദിവസം മാരിയോ ജോസഫിന്റെ വീട്ടിലെത്തിയപ്പോഴാണ് തർക്കം രൂക്ഷമായതും മർദ്ദനത്തിൽ കലാശിച്ചതും.

തർക്കത്തിനിടെ ഭർത്താവ് ടിവിയുടെ സെറ്റ് അപ്പ് ബോക്സ് എടുത്ത് തലയ്ക്ക് അടിച്ചെന്നും കയ്യിൽ കടിച്ചെന്നും ജിജി ചാലക്കുടി പോലീസിൽ നൽകിയ പരാതിയിൽ പറയുന്നു. മർദ്ദനത്തിൽ ജിജിയുടെ തലയ്ക്ക് പരിക്കേൽക്കുകയും 70,000 രൂപ വിലവരുന്ന മൊബൈൽ ഫോൺ നശിപ്പിക്കുകയും ചെയ്തിട്ടുണ്ട്. ജിജിയുടെ പരാതിയുടെ അടിസ്ഥാനത്തിൽ ഭർത്താവ് മാരിയോ ജോസഫിനെതിരെ പോലീസ് കേസെടുത്തു. അതേസമയം, മാരിയോ ജോസഫും ഭാര്യക്കെതിരെ പരാതി നൽകിയിട്ടുണ്ട്. ഈ പരാതി പോലീസ് പരിശോധിച്ച് വരികയാണെന്ന് അധികൃതർ അറിയിച്ചു.